پڕۆژەی بەنداوی چەمرگە كارەكانی تەواو بوو

ئاڤا نیوز 

پارێزگاری هەولێر ڕایگەیاند، هەموو كارەكانی پڕۆژەی بەنداوی چەمرگە كۆتاییان هاتووە و لە ئایندەیەكی نزیكدا دەبێتە سەرچاوەیەكی باشی دابینكردنی ئاوی پاك بۆ شاری هەولێر.

وێنە گەورەكە: تەواوبوونی بەنداوی چەمرگە گرنگی و ڕۆڵی سەرەكیی لە كەمكردنەوەی كاریگەرییەكانی وشكەساڵی، كەمئاویی لە وەرزی هاوین، كەمكردنەوەی مەترسییەكانی دروستبوونی لافاو لە وەرزی بارانبارین هەیە؛ جگە لەوەش دیمەنێكی جوان بە دەشتی هەولێر دەبەخشێت و دەبێتە هۆکار بۆ بووژاندنەوەی كەرتی گەشتیاری لە ناوچەكەدا.

لێدوانی فەرمی: ئومێد خۆشناو ـ پارێزگاری هەولێر بۆ ئاڤا نیوز گوتی: ئێستا تەواویی كارەكان لە پڕۆژەی ستراتیژیی بەنداوی چەمرگە تەواو بووە و ڕێژەی 100%ـی كارەكانی جێبەجێ كراون و لە ئایندەیەكی نزیكدا بە ڕووی گەشتیاراندا دەكرێتەوە.

ژمارەكان وادەڵێن: تێچووی درووستكرنی پڕۆژەی بەنداوی چەمرگە چوار ملیار دینار بووە و بە توانا و شارەزاییی ناوخۆیی و سوودوەرگرتن لە ستانداردی جیهانی، دروست كراوە.