ئاسایشی هەولێر ڕوونکردنەوە لەبارەی گیانلەدەستدانی داواکراوێک بڵاودەکاتەوە

ئاڤا نیوز 

بەڕێوەبەرایەتی نەهێشتنی ماددە هۆشبەرەکانی لە ئاسایشی هەولێر ڕایدەگەیێنێت، لە دادگە وەڵامی لێدوانی کەسوکاری ئەو داواکراوە دەدەینەوە کە لە ڕووبەڕووبوونەوەی هێزەکانیان گیانی لەدەست داوە.

چیرۆکی سەرەکی: ڕۆژی 23-4-2024 بەشی نەهێشتنی نەهێشتنی ماددە هۆشبەرەکان ڕایگەیاند: دوو تۆمەتبار کە بازرگانیی ماددەی هۆشبەر بوون، لەکاتی دەستگیرکردنیان ڕووبەڕووی هێزەکانیان بوونەوە، ئەندامێکی ئەو هێزەیان بریندار کردوو یەکێک لە داواکراوەکان کوژراو ئەوی دیکە دەستگیر کرا.

ئەوەی پێویستە بیزانیت: دوای بڵابوونەوەی ئەو هەواڵە، کەسوکاری کوژراوەکە گومانیان لەسەر ڕووداوەکە هەبووە "داوای پێکهێنانی لێژنەی سیاسی لەژێر ناوی (لێژنەی بێلایەن)ی بۆ ڕووداوەکە کردبوو".

ڕاگەیێنراوی فەرمی: ئاسایشی هەولێر ڕایگەیاند"دوای ئەوەی بە هۆی ڕووبەڕووبوونەوەی دوو داواکراو لەگەڵ هێزەکانی ئاسایش لە کاتی جێبەجێکردنی فەرمانی دادوەر، یەکێکیان گیانی سپارد، کەسوکارەکەی لێدوانیان هەبووە.

زانیاریی زیاتر:"لێرەدا ڕایدەگەیەنین کە تەواوی بەڵگەکان لەبەردەستی دادگەدان و ئەو دۆسیەیە ڕێڕەوی یاسایی خۆی دەبڕێت و نامانەوێت جگە لە بڕیار و ڕێنمایی دادگەکان هیچ ڕوونکردنەوەیەکی دیکە بدەین و وەڵامی ئەو لێدوانانەش تەنیا لە دادگە دەدەینەوە". ئاسایشی هەولێر وا دەڵێت.