ئێران دەست وەردەداتە شەڕی ناوخۆی سوودان

ئاڤا دیجیتاڵ

 

دەستێوەردانە دەرکییەکانی ئێران فراوانتر بوون، نوێترینیشیان بەشداربوونیەتی لە شەڕی ناوخۆی سوودان، دەستتێوەردانی ئێران لە رێگەی دابینکردنی پێداویستیی سەربازییەوەیە بۆ سووپای سوودان، کە ئێران دەیەوێت لە شەڕەکەدا براوە بێت.

چیرۆکە سەرەکییەکە: ئاژانسی بلوومبێرگ لە راپۆرتێکیدا ئاماژەی بەوە کردووە "ئێران لە رێگەی دابینکردنی درۆنی هێرشبەر بۆ سووپای سوودان لایەنگیریی لە شەڕی ناوخۆی ئەو وڵاتەدا دەکات، ئەمەش مەترسیی نائارامیی زیاتر لە باکووری ئەفریقا و دەریای سوور زیاتر دەکات". 

وێنە گەورەکە: زیاتر لە نۆ مانگە شەڕی ناوخۆی سوودان بەردەوامە و بە هۆیەوە ملیۆنان کەس ئاوارە بوون و قاتوقڕییەکی سەخت سەریهەڵداوە، مەترسیی تەشەنەسەندنی زیاتری شەڕەکە و ناسەقامگیرکردنی ناوچەکەش زیاتر بووە، لەم شەڕەدا ئێران لایەنگریی لە سووپا دەکات، لە بەرامبەریشدا ئیمارات لایەنگیری لە  هێزەکانی پاڵپشتیی خێرا دەکات. 

بەو پێیەی سوودان کەناراوێکی 400 میلی لەگەڵ دەریای سووردا هەیە، بۆیە نائارامیی لە سوودان کاریگەری لە سەر ئاسایشی جووڵەی دەریایی لە دەریای سوور دەبێت، ئەمە لە کاتێکدایە کە چین، رووسیا و تورکیا لە سەر دەستپێڕاگەشتن بە دەریاکە پێشبڕکێیانە. 

زانیاریی زیاتر: ئێران درۆنی جۆری موهاجیر-شەشی بە سووپای سوودان داوە، ئەم درۆنە لەلایەن پیشەسازیی هێزی قودسی ئاسمانییەوە درووست کراوە کە درۆنێکی هێرشبەرە.

 

باکگراوند: بە گوتەی بەرپرسانی ئەمریکا، ئێران پاڵپشتیی لە بەشێک لە هێزەکانی دیکەی ناوچەکە دەکات، وەک حەماس لە غەززە، حیزبوڵڵا لە لوبنان، حووسییەکان لە یەمەن، کەتائیبی حیزبوڵا لە عێراق و سووپای ئەسیوپیا، ئێستا دەیەوێت لە رێگەی پاڵپشتیکردنی سووپای سوودانەوە، رۆڵی سەربازیی خۆی فراوانتر بکات، ئەوەش لەكاتێكدایە پێشتر ئەمریکا ئێرانی بە دابینکردنی درۆنی موهاجیر شەش بە رووسیا تۆمەتبار كردبوو، بۆ بەکاربردنی لە شەڕی دژ بە ئۆکراینا.