بە نێوەندگیری ئەمریکا ئیسرائیل و حەماس نزیکن لە ڕاگرتنی شەش

ئاڤا دیجیتاڵ

 

هەریەک لە ئیسرائیل و حەماس بە نێوەندگیریی ئەمریکا، لە ڕاگەیاندنی ئاگربەستێکی کاتی و ئازادكردنی بارمتەکان نزیکدەبنەوە. پڕۆژەکە لەلایەن بەرپرسانی ئەمریکاوە گەڵاڵەکراوە و خراوەتە بەردەم لایەنە شەڕکەرەکان. 

وێنە گەورەکە: بەگوێرەی راپۆرتی میدیاکانی ئەمریکا، دانوستانکارانی ئەمریکا بەرەوپێشچوونی باشیان لە نێوەندگیریکردن لە نێوان ئیسرائیل و حەماس بەدەستهێناوە، بەڵام هێشتا کۆمەڵێک خاڵی جیاواز لە نێوانیاندا ماوە کە لەسەری کۆک نین. ئەمریکاش لە هەوڵەکانی بۆ راِگرتنی شەڕ و ئازادكردنی بارمتەکان بەردەوامە. 

رێككەوتنەكە بەمشێوەیە: بەگوێرەی پلانەکەی ئەمریکا بۆ رێککەوتنی نێوان ئیسرائیل و حەماس، ئیسرائیل پابەند دەبێت بە وەستاندنی ئۆپەراسیۆنە سەربازییەکانی لە کەرتی غەززە بۆ ماوەی دوو مانگ، لە بەرامبەریشدا حەماس زیاتر لە 100 بارمتەی ئیسرائیلی ئازاد دەکات. 

شێوازی جێبەجێكردن : ئەگەر ئیسرائیل و حەماس لە سەر پڕۆژە ئەمریکییەکە رێک بکەون، ئەوا بە دوو قۆناغ رێککەوتنەکە جێبەجێ دەکرێت، لە قۆناغی یەکەمدا شەڕ دەوەستێنرێت تا ژنان، کەسانی بەتەمەن، بارمتە بریندار و نەخۆشەکانی ژێر دەستی حەماس ئازاد بکرێن. دواتر لە ماوەی دوو مانگی وەستانی شەڕدا هەردوولا لە سەر وردەکارییەکانی ئازادکردنی سەربازانی ئیسرائیلیی دیلکراوی لای حەماس و ژمارەیەکی زیاتر لە بارمتە سیڤیلەکان گفتوگۆی زیاتر دەکەن.
لە بەشێکی دیکەی پڕۆژەکەدا داوا لە ئیسرائیل دەکرێت رێگە بە گەیاندنی یارمەتیی مرۆیی زیاتر بۆ غەززە بدات. 

ئەوەی ئێستا ڕوودەدات: هەرچەندە هێشتا رێککەوتنی تەواوەتی لە سەر پڕۆژە ئەمریکییەکە نەکراوە، بەڵام بەرپرسانی ئەمریکا رایانگەیاندووە لەگەڵ ئەوەدا رێککەوتنەکە زۆر هەستیارە، بەڵام دوور نیە. 

 

ئەوەی پێویستە بیزانیت: هەرچەندە پڕۆژە پێشنیازی ئەمریکا کۆتایی بە شەڕی نێوان ئیسرائیل و حەماس ناهێنێت، بەڵام بەرپرسانی ئەمریکا ئومێدەوارن کە لە رێگەی رێککەوتن و جێبەجێکردنی ئەم پڕۆژەیەوە زەمینەی گەشتن بە رێگەچارەیەکی بەردەوام بێتە ئاراوە.

گفتوگۆکانی پەیوەست بەم پڕۆژەیە و دانوستانەکان لە پاریسی پایەتەختی فەڕەنسا بەڕێوە دەچن. بڕیارە لەم چوارچێوەیەدا، ئەمڕۆ یەکشەممە سەرۆکی دەزگای هەواڵگریی ئەمریکا، سی ئای ئەی، لەگەڵ سەرۆکی دەزگای هەواڵگریی ئیسرائیلی، سەرۆکی دەزگای هەواڵگریی میسر و سەرۆکوەزیرانی قەتەر گفتوگۆ بکات. 

لەلایەکی دیکەوە: هەر پەیوەست بەم بابەتە، جۆ بایدن، سەرۆکی ئەمریکا لە رێگەی تەلەفۆنەوە لەگەڵ عەبدولفەتاح سیسی، سەرۆکی میسر و شێخ تەمیم بن حەمەد ئال سانی، ئەمیری قەتەر، گفتوگۆی کردووە. 

باکگراوند: پێشتر برێت مەکگۆرک، راوێژکاری باڵای کۆشکی سپی، بە مەبەستی ئامادەسازی بۆ ئەم رێککەوتنە، سەردانی رۆژهەڵاتی ناوەڕاستی کردبوو و سەبارەت بە دۆخی بارمتەکان لەگەڵ بەرپرسانی ناوچەکە کۆبووبووەوە. 

ئەوەی پێشبینی دەكرێت: چاوەڕێ دەکرێت دوای کۆبووەوەکەی سەرۆکی سی ئای ئەی لە پاریس، کۆشکی سپی جارێکی دیکە مەکگۆرگ رەوانەی رۆژهەڵاتی ناوەڕاست بکات تا رێککەوتنەکە بە تەواوەتی بكرێت.