ئەو دوو چەکدارەی هێرشیان کردە سەر کلێساکەی ئیستەنبووڵ دەستگیرکران

ئاڤا دیجیتاڵ

 

ئەو دوو چەكدارەی هێرشیان كردە سەر كڵێسایەك لە ئیستەنبووڵ لە لایەن هێزە ئەمنیەكانەوە دەستگیركران، ڕێكخراوی داعش بەرپرسیاریەتی خۆی لە هێرشەكە ڕاگەیاند و دەڵێت "جولەكە و كریستیانەكان لە هەر شوێنێك بن دەكرێنە ئامانج".

 

چیرۆكی سەرەكی: عەلی یەرلیکایا، وەزیری ناوخۆی تورکیا لە  کۆنگرەیەکی رۆژنامەوانیدا رایگەیاند " لە ئۆپەرسیۆنێکی هێزە ئەمنیەكانی تورکیا لە ماوەی 12 کاتژمێردا، ئەو دوو چەکدارە دەمامکدارەی دوێنێ هێرشیان کردە سەر کڵێسایەکی ئیتاڵی لە ئیستەنبووڵ دەستگیرکراون و لێکۆڵینەوەیان لەگەڵ دەکرێت". 

 

زانیاری زیاتر: هەردوو تۆمەتبارەکە  بیانیین، یەکێکیان خەڵکی روسیایە و ئەوەی دیکەیان کازاخستان، هەروەها 47  كەسی دیكەش بەگومانی  ئەوەی دەستیان لە هێرشەکەدا هەیە، دەستبەسەركراون". یەرلیکایا وای گوت.

 

وەزیری ناوخۆی تورکیا دەشڵێت "وای بۆ دەچین ئەو تۆمەتبارانە سەر بە گرووپی تیرۆریستی داعش بن".

 

لە لایەکی دیکەوە: داعش لە تیلیگرام بەرپرسیاریەتی خۆی لە هێرشەكەی سەر كڵێساكەی شاری ئیستەنبووڵ راگەیاند، كە بەهۆیەوە كەسێك گیانی لەدەستدا.

 

داعش دەڵێت"هێرشەکە لە ژێر فەرمانی سەرکردەکانی رێکخراوەکەمان کراوە، دەبێت جوولەکە و كریستیانەكان لە هەموو شوێنێکدا بکرێنە ئامانج".

 

باکگراوند: ڕۆژی یەکشەممە، 28-1-2024، لە کاتی مەراسیمی هەفتانەی كریستیانەكان لە کڵێسای سانتا ماریای ئیتاڵی لە ئیستەنبووڵ ، دوو چەکدار هێرشیان کردە سەر خەڵكی نێو کڵێساکە، تونجەر سیهانی تەمەن 52 ساڵ کە لە کاتی ڕووداوەکەدا فیشەك بەر سەری کەوتبوو، گیانی لەدەستدا.