تەمەنی کۆمیسیۆنی هەڵبژاردنەکانی عێراق درێژ دەکرێتەوە

ئاڤا نیوز

پەرلەمانی عێراق، بڕگەیەکی بۆ دانیشتنەکەی زیاد کرد کە هەموارکردنەوەی یاسای کۆمیسیۆنی هەڵبژاردنەکانە و خوێندنەوەی یەکەمیشی بۆ کرا.

ئەوەی پێویستە بیزانیت: لە دانیشتنی ئەمڕۆی پەرلەمانی عێراق و بە زۆرینەی دەنگی پەرلەمانتاران، بڕگەی دیکە بۆ کارنامەی دانیشتننەکە زیاد کرا کە تایبەت بوو بە خوێندنەوەی یەکەم بۆ هەمواری مادەی حەوتی یاسای کۆمیسیۆن و درێژکردنەوەی تەمەنی.

زانیاریی زیاتر: کۆمیسیۆنی باڵای هەڵبژاردنەکانی عێراق لە حەوتی تەمووزی ئەمساڵ، تەمەنی کۆتایی دێت. بەپێی هەموارەکە تەمەنی ئەنجوومەنی کۆمیسیاران بۆ شەش مانگی دیکە درێژ دەکرێتەوە. لە دانیشتنەکەی پەرلەماندا خوێندنەوەی یەکەم بۆ یاساکە کرا و دوای ئەوەش دانیشتنەکە هەڵگیرا.

هۆکارە زانراوەکان: ئامانج لە هەموارەکە ئەوەیە، کۆمیسیۆنی هەڵبژاردنەکانی عێراق بتوانێ سەرپەرشتیی بەڕێوەبردنی هەڵبژاردنی پەرلەمانی کوردستان بکات.

وێنە گەورەكە: پارتی دیموكراتی كوردستان و ژمارەیەك لایەنی سیاسی دیكە، لە شێوازی بەڕێوەچوونی هەڵبژاردن ناڕازین و تێبینییان هەیە.