بۆچی ئەمریكا نەیتوانی درۆنە هێرشبەرەكەی ئوردن تێكبشكێنێت؟

ئاڤا دیجیتاڵ

میدیاكانی ئەمریكا بە بایەخەوە بە دوای وەڵامی ئەو پرسیارەوەن كە بۆچی ئەمریكا لە پاراستنی بنكە سەربازییەكەی لە ئوردن شكستی هێنا، نەیتوانی رووبەڕووی هێرشە درۆنییەكە ببێتەوە و تێكیبشكێنێت.

چیرۆكی سەرەكی: رۆژنامەیەكی ئەمریكی راپۆرتێكی بڵاو كردووەتەوە و هۆكارەكەی بۆ ئەوە دەگەڕێنێتەوە كە سیستەمی بەرگری بنكەكەی نەیتوانیوە بزانێت درۆنەكە هی خۆیانە و دەنیشێتەوە، یاخوود هی دوژمنە و هێرش دەكات.

زانیاری زیاتر: بە گوێرەی راپۆرتێكی رۆژنامەی وۆڵ ستریت جۆرناڵی ئەمریكی، هۆكاری شكستی هێزەكانی ئەمریكا لە بنكەی تاوەر22 لە ئوردن لە تێكشكاندنی هێرشە درۆنییەكەدا بۆ ئەوە دەگەڕێتەوە كە سیستەمی بەرگری بنكەكە نەیتوانیوە ناسنامەی درۆنەكە بناسێتەوە و نەیزانیوە درۆنەكە هێرشبەرە یاخوود هی خۆیانە، لەبەرئەوەی لەوكاتەدا بنكەكە چاوەڕێی گەڕانەوەی درۆنێكی هێزەكانی ئەمریكا بووە بۆ بنكەكە، بەڵام درۆنە هێرشبەرەكە هێرشی بردووە.

باكگراوند: هێرشە درۆنییەكەی سەر بنكەی سەربازیی ئەمریكا لە ئوردن بووە هۆی كوژرانی سێ سەرباز و برینداربوونی 34 سەربازی دیكەشی لێكەوتەوە.

ئەوەی ئێستا ڕوودەدات: گرووپی "مقاوەمەی ئیسلامی لە عێراق" بەرپرسیارێتیی خۆی لە هێرشەكە راگەیاند، ئەمریكا ئێرانی بە پاڵپشتیكردنی هێرشبەرەكان تۆمەتبار كردووە، بەڵام ئێران نكۆڵی لە تێوەگلان لە هێرشەكە كردووە، ئەمریكا هەڕەشەی تۆڵەسەندنەوە دەكات و گوشارەكان لە سەر بایدن بۆ ئەنجامدانی هێرشی تۆڵە زیاتر بوون.