چەند بڕیارێک لە پارێزگاری هەولێرەوە لەبارەی قەرەبووکردنەوەی دووکاندارانی بازاڕی قەیسەری

ئاڤا نیوز 

 

ئومێد خۆشناو، پارێزگاری هەولێر چەند بڕیارێکی لەبارەی زیانلێکەوتووانی ئاگرەکەی بازاڕی قەیسەریی هەولێر دەرکرد و بڕیاری لێخۆشبوون لە کرێی شەش مانگی هەڵواسین و زبڵ و لێخۆشبوون لە 50% باجی ساڵی 2023 و لێخۆشبوونی تەواوەتی باجی 2024 درا. 

 

چیرۆکی سەرەکی: شەوی 05-05-2024 ئاگرێکی گەورە لە بازاڕی قەیسەری شاری هەولێر کەوتەوە، بەو هۆیەوە 227 دووکان و حەوت کۆگای بچووکی بازاڕەکە سووتان و زیانیان پێگەیشت.

 

لێدوانی فەرمی: ئومێد خۆشناو، پارێزگاری هەولێر لەگەڵ دووکاندارانی بازاڕی قەیسەریی هەولێر کۆبووەوە و پێیانی ڕاگەیاند: لە کرێی شەش مانگی هەڵواسینی ڕێکلام و زبڵی ئەو دووکانانە خۆش دەبن کە زیانیان بەرکەوتووە.

زانیاریی زیاتر: بڕیارەکان ئەمانە:

- لێکۆڵینەوە لە هۆکارى کارنەکردنى سیستەمى جێگیرى ئاگرکوژێنەوە دەکرێت.

- سەرتاسەری بازاڕەکە پاکدەکرێتەوە.

- لە زوترین کاتدا، دەست بە نۆژەنکردنەوەى ناوەوەى دوکانەکان، کۆڵانەکان و بنمیچی بازاڕەکە دەکرێت.

- سەرجەم کەموکوڕییەکانى ئاو و کارەباى بازاڕەکە چارەسەر دەکرێن.

- سەرپێچى و زێدەڕۆییەکانی کە دەبنە هۆکاری ئاگر لادەبرین.

- پاراستنی بازاڕەکە لە کۆمپانیای تایبەتى سیکیوریتی وەردەگیرێتەوە و لە شوێنى ئەوان، ڕادەستی پۆلیس دەکرێت.

- هەر دووکاندارێک کرێچى حکومەت بێت و لەو ئاگرکەوتنەوەیە زیانى کردبێت، لە کرێى یەک ساڵى دووکانەکەى دەبەخشرێت.

- سەرجەم ئەو دووکاندارانەى لە ئاگرکەوتنەوەکەدا زەرەمەندبوون، لە کرێى شەش مانگى زبڵ و خاشاک و تابلۆ دەبەخشرێن.

- سەرجەم ئەو دووکاندارانەى لە ئاگر کەوتنەوەکەدا زەرەمەندبوون، بۆ ساڵى 2023 لە 50%ـى باج و بۆ ساڵى 2024 لە 100%ـى باج دەبەخشرێن.

- هەر دووکاندارێک بەهۆى کەوتنەوەى ئاگر زەرەرمەند بوو بێت، دواى وەرگرتنى نووسراوى پشتگیرى لە بەڕێوەبەرایەتىی قەیرانەکانى پارێزگاى هەولێر، دەتوانێت لە وەرگرتنى قەرزى بێ قازانج سوودمەند بێت.

- هەر دووکاندارێک بەهۆى ئاگرکەوتنەوەکە، پارەى لەنێو دوکانەکەى 'تەنها دینارى عێراقى' سووتا بێت، لایەنە پەیوەندیدارەکانى حکومەت هاوکارى دەبن بۆ قەرەبووکردنەوەى لە بانکى ناوەندى لقى هەولێر.

 

لەلایەکی دیکەوە: سەبارەت بە ڕۆڵی یونسکۆ لە نۆژەنکردنەوەی بازاڕی قەیسەری نەبەز عەبدولحەمید، قایمقامی قەزای ناوەندیی هەولێر، بە ئاڤا نیوزی گوت: بەو شێوەیە نییە کە دەڵێن، نۆژەنکردنەوەی قەیسەری پەیوەستە بە بڕیارەکانی یونسکۆوە، بەڵکوو حکومەت خۆی بڕیار لەمبارەیەوە دەردەکات، نۆژەنکردنەوەی ئەو بازاڕەش پەیوەستە بە ڕێنماییەکانی لیژنەی بەفەرزونکردن.