کۆمپانیای فڵای بەغداد دەست بە گەشتەکانی دەکاتەوە

ئاڤا دیجیتاڵ

 

کۆمپانیای فڵای بەغدا رایدەگەیێنێت، بەهۆی ئەوەی هیچ یەکێک لەو تۆمەتانەی لەلایەن ئەمریکاوە ئاراستەیان کرابوون، لەلایەن لیژنەی لێکۆڵینەوەی حکومەتی عێراق پشتڕاست نەکراونەتەوە، دەست بە گەشتە ئاسمانییەکانی دەکاتەوە. 

 

چیرۆکی سەرەکی: کۆمپانیای فڕۆکەوانیی فڵای بەغداد، کۆمپانیایەکی فڕۆکەوانیی عێراقییە و رۆژی دووشەممە 22-01-2024، بەتۆمەتی بەقاچاغبردنی دۆلار، گواستنەوەی چەک و چەکدار، هاوکاریکردنی سوپای پاسدارانی ئێران و گرووپە چەکدارەکانی نزیک ئەو وڵاتە لە عێراق، سووریا و لوبنان، لەلایەن وەزارەتی گەنجینەی ئەمریکاوە سزای بەسەردا سەپێنرا.

لەلایەکی دیکەوە: رۆژێک دواتر بانكی ناوەندیی عێراق پابەندبوونی بە سزاکانی ئەمریکا راگەیاند و سێ هەژماری بانکی کۆمپانیای فڵای بەغدادی بلۆک کرد. حکومەتی عێراقیش بە بڕیای محەممەد شیاع سوودانی لیژنەیەکی لێکۆڵینەوەی لەسەر کۆمپانیاکە پێکهێنا. وێڕای رەتکردنەوەی سەرجەم تۆمەتەکانیش لەلایەن کۆمپانیای فڵای بەغداد، لە کاردانەوەی سزاکان سەرجەم گەشتە ئاسمانییەکانی راگرت.

لێدوانی فەرمی: ئەمڕۆ چوارشەممە لە روونکردنەوەیەکدا کۆمپانیاى فڵاى بەغداد رایگەیاند: "دوای کۆتاییهاتنی لێکۆڵینەوەی ئەو لیژنەیەی لەلایەن سەرۆکوەزیرانی عێراقەوە پێکهێنرابوو، هیچ بەڵگەیەک نەبووە لەسەر ئەو تۆمەتانەى لەلایەن وەزارەتى گەنجینەى ئەمریکا ئاراستەى ئێمە کرابوو، بۆیە ئاگاداری گەشتیارانمان دەکەینەوە کە سبەی پێنجشەممە 1-2-2024  دەست بە گەشتەکانمان دەکەینەوە". ئەمە لەکاتێکدایە تاوەکو ئێستا حکومەتی عێراق هیچ لێدوانێکی لەمبارەیەوە نەداوە.