دادگەی فیدراڵی دانیشتنەکەی دواخست

ئاڤا نیوز

 

بڕیاربوو دادگەی باڵای فیدراڵیی عێراق، لەبارەی سێ تەوەر کۆ ببێتەوە، کە تەوەرێکیان پەیوەست بوو بە هەڵبژاردنی پەرلەمانی کوردستان، بەڵام دانیشتنەکە بۆ ڕۆژی سێشەممە 21-05-2024 دواخرا.

 

وێنە گەورەکە: کۆمیسیۆنی عێراق، هەڵبژاردنی هەرێمی کوردستانی بەسەر چوار بازنە دابەش کردووە، لە دابەشکردنیدا پشتی بە ژمارەی دەنگدەران بەستووە لەبری ژمارەی دانیشتووان، لە سکاڵاکەی سەرۆکوەزیران بارزانیدا داواکراوە بە نادەستووری دابنرێت و مافی پێکهاتەکان گرەنتی بکرێت.

 

ئەوەی پێویستە بیزانیت: بەگوێرەی کارنامەی دانیشتنەکە دادبینی بۆ سێ سکاڵا دەکرا، بڕگەی دووەم پەیوەست بوو بە دادبینی بۆ سکاڵای سەرۆکوەزیران بارزانی. 

 

لێدوانی فەرمی: ئەیاد کاکەیی پارێزەری سەرۆکوەزیران بارزانی بە ئاڤا نیوزی گوت: لەبەرئەوەی دوو لە دادوەرەكان لە مۆڵەت بوون بە هۆیەوە دانیشتنەكە دواخراوە.

 

بۆچی گرنگە: بە یەکلاییکردنەوەی دۆسیەکە، وادەی نوێی بەڕێوەچوونی هەڵبژاردنی خولی شەشەمی پەرلەمانی کوردستان ڕوون دەبێتەوە.

 

ئەوەی پێشبینی دەکرێت: چاوەڕوان دەکرێت لە 100 کورسیی پەرلەمانی کوردستان، مافی پێکهاتەکان گەرەنتی بکرێت و لەسەر بنەمای دانیشتووان ڕێژەی کورسیی پارێزگاکان دیاری بکرێت.