زیانلێکەوتووانی بازاڕی قەیسەریی کەرکووک قەرەبوو دەکرێنەوە

ئاڤا نیوز 

سەرۆکی فراکسیۆنەکانی پارتی و یەکێتیی لە ئەنجوومەنی پارێزگای کەرکووک ڕایانگەیاند، لەگەڵ لایەنی پەیوەندیدار بۆ لێکۆڵینەوە و دۆزینەوەی هۆکاری سووتانی بازاڕی قەیسەریی لەسەر هێڵن.

بۆچی گرنگە: لایەنە کوردییەکانی ئەنجوومەنی پارێزگای کەرکووک خۆیان بە پشتیوان و داکۆکیکاریی خەڵکی شارەکە دەزانن، دوای ڕووداوەکانی 16ی ئۆکتۆبەر، ئەم هێزانە خوازیاری وەرگرتنەوەی ڕۆڵ و پێگەی جارانی خۆیانن. 

چیرۆکی سەرەکی: دوێنێ یەکشەممە، ئاگرێکی گەورە لە بازاڕی کۆنی قەیسەریی کەرکووک کەوتەوە، بە گوێرەی زانیارییەکان زیاتر لە 100 دووکان و کۆگا سووتاون.

لێدوانی فەرمی: حەسەن مەجید، سەرۆکی فراکسیۆنی پارتی لە ئەنجوومەنی پارێزگای کەرکووک، ڕایگەیاند: تا دۆزینەوەی هۆکاری ڕووداوەکە هەنگاو بە هەنگاو لەگەڵ لیژنەکانی لێکۆڵینەوە دەبین، چونکە بۆ جاری دووەمە هەمان بازاڕ دەسووتێت، جگە لە دووکانەکان کۆگاکانیش سووتاون.

لە لایەکی دیکەوە: ڕێبوار تەها، سەرۆکی فراکسیۆنی یەکیتی لە ئەنجوومەنی پارێزگای کەرکووک، ڕایگەیاند: ئامانجی سەردانەکەمان دوو خاڵە، یەکەم زانینی هۆکاری ئاگرکەوتنەوەکە، دووەم قەرەبووکردنەوەیان لەلایەن ‌حکومەتەوە، پێداگر دەبین لەسەر قەرەبووکردنەوەیان.