نزیکەی 400 دۆنم زەویی چێنراو بە گەنم لە سنووری هەولێر سووتان

ئاڤا نیوز

 

گوتەبێژی بەرگریی شارستانیی هەولێر ڕایدەگەیێنێت، لە سنووری ناحیەی قوشتەپە 381 دۆنم زەویی بە گەنم چێنراو سووتاوە و هاووڵاتییەکیش بریندارە.

 

چیرۆکی سەرەکی: نیوەڕۆی ئەمڕۆ چوارشەممە، جووتیارانی سنووری قوشتەپە لە کاتی دروێنەی بەرهەمەکەیان بە دەڕاسە، بەهۆی پریشکی ئاگرەوە 381 دۆنم زەوی چێنراو بە گەنمیان سووتا و زیان بە بەرهەمی 19 جووتیاریان بەرکەوت.

 

لێدوانی فەرمی: شاخەوان سەعید، گوتەبێژی بەرگریی شارستانیی هەولێر بە ئاڤا نیوزی گوت، "چوار تیمی بەرگریی شارستانی، سەرقاڵی کوژاندنەوەی ئاگرەکە بوون و ئاگرەکە کۆنتڕۆڵ کرا".

 

زانیاریی زیاتر: بەهۆی ئاگرەکەوە شوفێری تراکتۆرێک برینداربووه و بەشێکی تراکتۆرەکەشی سووتاوە.

 

ئەوەی پێویستە بیزانیت: ئێستا وەرزی دروێنەی گەنمە و لە پارێزگاکانی عێراق پڕۆسەی وەرگرتنی گەنم دەستی پێ کردووە، بڕیارە لە 01-06-2024ـەوە لە هەرێمی کوردستانیش دەست پێ بکات.