ئەردۆغان دوای زیاتر لە 10 ساڵ سەردانی قاهیرە دەکات

ئاڤا دیجیتاڵ

 

دوای زیاتر لە 10 ساڵ لە ئاڵۆزیی پەیوەندییەکانی نێوان تورکیا و میسر، سەرۆکی تورکیا لە ناوەڕاستی ئەم مانگە سەردانی قاهیرە دەکات.

 

بۆچی گرنگە: گرنگی سەردانەکەی ئەردۆغان بۆ قاهیرە، وەک هەوڵێک بۆ ئاساییکردنەوەی پەیوەندییەکانی تورکیا لەگەڵ میسر دادەنرێت، ئاژانسی هەواڵی بلومبێرگ بە پشتبەستن بە چەند بەرپرسێکی تورکیا ئەو زانیارییەی ئاشکرا کردووە. 

 

ئەوەی پێویستە بیزانیت: بەگوێرەی ئەو زانیارییانەی لەبارەی ناوەڕۆکی سەردانەکەی ئەردۆغان بڵاوبووەتەوە، 14 ـی شوباتی مانگی داهاتوو، ئەردۆغان لەگەڵ عەبدولفەتاح سیسی سەرۆکی میسر کۆدەبێتەوە، هەردوولا باس لە چۆنییەتی گەیاندنی هاوکارییە مرۆییەکان بۆ غەزە و  قۆناغی دوای کۆتاییهاتنی شەڕەکە دەکەن.

 

زانیاریی زیاتر: پرسەکانی زیادکردنی قەبارەی بازرگانی دوولایەنە و دیاریکردنی سنوورە دەریاییەکان کە دەبێتە هۆی دەستڕاگەیشتنێکی زیاتری تورکیا بە سەرچاوەکانی وزە لە دەریای ناوەڕاستدا لە بەرنامەی کاردایە.

 

هۆکارە زانراوەکان: سوپای میسر بە سەرۆکایەتیی عەبدولفەتاح سیسی، حکومەتەکەی محەمەد موورسی ئەندامی ئیخوان موسلیمینیام ڕووخاند و لە 03ـی تەمموزی 2013 دەسەڵاتی سەرۆکایەت میسڕی گرتە دەست.

 

ئەردۆغان کە لەو کاتەدا سەرۆکوەزیرانی تورکیا بوو، بەتووندی ڕەخنەی لە کودەتاکەی دژی ئیخوان موسلیمین گرت و ئەمەش کاردانەوەی قاهیرەی لێکەوتەوە.

پەیوەندییەکانی نێوان هەردوولا گەیشتە خاڵی پچڕان، ئیدارەی میسر لە ساڵی 2013دا حوسێن ئەڤنی بۆتسەلی باڵیۆزی قاهیرەی لە تورکیا بە کەسایەتییەکی نەناسراو ناساند بە پاساوی ئەوەی کە "ئەنقەرە دەستوەردان لە کاروباری ناوخۆی قاهیرە دەکات".

 

دوای تێکچوونی پەیوەندییەکانی نێوان هەردوو وڵات دوای کودەتاکەی میسر لە ساڵی 2013، ئەردۆغان و سیسی لە کردنەوەی مۆندیالی قەتەر لە تشرینی دووەمی 2022 کە یەکییان بینی تەوقەیان کرد.

 

باکگراوند: دوایین جار، لە مانگی ئەیلوولی ساڵی ڕابردوودا، لە چوارچێوەی کۆبوونەوەی لوتکەی سەرکردەکانی کۆڕبەندی ئابووریی G20، ڕەجەب تەیب ئەردۆغان لەگەڵ عەبدولفەتاح سیسی سەرۆککۆماری میسر لە نیودەلهی پایتەختی هیندستان کۆبووەوە.