فیرقەیەکی پێشمەرگە لە دهۆک پێکدەهێنرێت

ئاڤا نیوز

لە چوارچێوەی داواکاری و هەوڵەکانی هاوپەیمانان فیرقەی سێی هێزەکانی پێشمەرگە لە دهۆک پێکهێنرا.

وێنە گەورەکە: لە کابینەی نۆیەمدا بە هاوکاری هێزەکانی هاوپەیمانان بەسەرۆکایەتیی ئەمریکا گرنگی زیاتر بە یەکخستنەوە و چاکسازیکردن لە هێزەکانی پێشمەرگە دراوە و پرۆسەکەش بەردەوامە.

بۆچی گرنگە: دەبێتە هۆی بەهێزکردن و پتەوکردنی زیاتری هێزەکانی پێشمەرگە، متمانە و پشتگیری و هاوکاری زیاتری هاوپەیمانێتیی نێودەوڵەتیش بەدەستدێنێت.

زانیاریی بەدەستهاتوو: سەرچاوەیەک لە وەزارەتی پێشمەرگە بە ئاڤا نیوزی ڕاگەیاند: فیرقەکە لە چوار لیوا پێکدێت، هەر لیوایەک لە سێ فەوج و هەر فەوجێکیش لە چوار سریەی 120 کەسی پێکدێت، واتە فیرقەکە 5 هەزار و 760 پێشمەرگە لەخۆدەگرێت. 

زانیاریی زیاتر: ئێستا لە سلێمانیش وەزارەتی پێشمەرگە سەرقاڵی پێکهێنانی فیرقەی چوارەمە. تاوەکو ئێستا 30  لیوای هاوبەش پێکهێراون و 60 هەزار پێشمەرگە لەخۆدەگرن، پێکهێنانی 15 لیوایان تەنیا لە کابینەی نۆدا بووە.

ئەوەی پێویستە بیزانیت: سەرجەم هێزەکانی پێشمەرگە لەژێر 11 فیرقەدا کۆدەکرێنەوە، پێنج فیرقەیان لە هەولێر و دهۆک و پێنج فیرقەشیان لە سلێمانی و هەڵەبجە دەبن، فیرقەیەکی ناوەندیش لە وەزارەت دەبێت و ئەرکی سەرپەرشتیکردنی سەرجەم فیرقەکانی دیکە دەبێت.