ئومێد خۆشناو: دەست بە دابەشکردنی نەوتی سپی دەکرێت

ئاڤا نیوز

پارێزگاری هەولێر دەڵێت، لە چەند ڕۆژی داهاتوودا پرۆسەی دابەشکردنی نەوتی نەوتی سپیی ماڵان لەنێو سەنتەری شاری هەولێر دەستپێدەکات و "ئێستا چاوەڕێی بەغداین بۆ ناردنی بەشە نەوتەکە".

وێنە گەورەکە: ساڵانە بەر لە هاتنی وەرزی سەرما، لە هەرێمی کوردستان پرۆسەی دابەشکردنی نەوتی سپیی ماڵان بەسەر هاونیشتمانیان دەستپێدەکات، ئەمساڵ لە ناوچە شاخاوییەکان زووتر لە ساڵانی ڕابردوو پرۆسەکە دەستیپێکرد، بەڵام لە سەنتەری شاری هەولێر تاوەکو ئێستا دەستی پێنەکردووە.

لێدوانی فەرمی: ئومێد خۆشناو، پارێزگاری هەولێر بە ئاڤای ڕاگەیاند:  لە ناوچە شاخاوییەکانی سنووری پارێزگای هەولێر پرۆسەی دابەشکردنی نەوتی سپیی ماڵان دەستیپێکردووە و تاوەکو ئێستاش بەردەوامە کە 50٪ی ئەو نەوتەی دابینکراوە، دابەشکراوە.

ئومێد خۆشناو ئاشکراشی دەکات، بەپێی ئەو ئامادەکارییەی کراوە، بۆ دابەشکردنی نەوتی سپیی ماڵان لە سەنتەری شاری هەولێر، پلان وایە لە چەند ڕۆژی داهاتوودا لەگەڵ گەیشتنی نەوت لە بەغداوە دەست بە دابەشکردنی بکەین.

- دابەشكردنی نەوت جگە لە ناوچە شاخاوییەکان، لە قەزا و ناحیەی ناوەندی پارێزگای هەولێریش دەستیپێکردووە.