هەولێر و تاران؛ بەرەو بازرگانییەکی هەڵکشاو

ئاڤا نیوز

 

تاوەکو دێت قەبارەی بازرگانی نێوان هەرێمی کوردستان و ئێران بەرەو زیاتر دەچێت، ساڵانە شەش ملیار دۆلاری تێپەڕاندووە.

 

لێدوانی فەرمی: مستەفا شێخ عەبدولرەحمان، سەرۆکی یەکێتیی هاوردە و ناردنکاران دەڵێت: سەرۆکوەزیران بارزانی ڕۆڵی گرنگی هەبووە لە برەودان بە زیادکردنی قەبارەی هەناردەکردنی ناوخۆیی.

 

وێنە گەورەکە: وەک دەردەکەوێت، هەرێمی کوردستان و تاران پەرۆشن بۆ ئەوەی ڕایەڵی بازرگانی نێوانیان بەهێزتر بکەن، دەروازەی زیاتر لە نێوان هەرێمی کوردستان و ئێران بکرێنەوە، کە سیمای وەک بازرگانیەکی بە‌هێزی نێودەوڵەتی دەردەکەوێت.

 

یەکەمجارە سەردانی هەولێر دەکات

بڕیارە ڕۆژی هەینی 13-6-2024، عەلی باقر کەنی، سەرپەرشتیاری وەزارەتی دەرەوەی ئێران، سەردانی بەغدا و هەولێر بکات، ئەمە یەکەم سەردانیەتی دوای دەستبەکاربوونی وەک سەرپەرشتیاری وەزارەتی دەرەوەی ئێران. ئەو مەلەفانەی لەگەڵ خۆی دەیانهێنێتە سەر مێزی گفتوگۆ، بابەتەکانی (بازرگانی، ئابووری و ئاسایش) دەبن، سێ پرسی گرنگ بۆ هەدوولا.

 

ڕۆڵی سەرۆکوەزیران بارزانی لە هەناردەکردنی بەرهەمی ناوخۆیی

مستەفا شێخ عەبدولرەحمان، سەرۆکی یەکێتیی هاوردە و ناردنکاران گوتی: سەرۆکوەزیران بارزانی ڕژدە لەسەر زیادکردنی هەناردەکردنی بەرهەمی ناوخۆیی بۆ دەرەوە، ئەو ڕۆڵی کارای هەبووە.

 

هەولێر ئاسانکاری دەکات

هەرێمی کوردستان ئاسانکاری بۆ وەبەرهێنەرە ئێرانییەکان دەکات، بۆئەوەی ئاستی بەگەڕخستنی سەرمایە و ئاڵوگۆڕی بازرگانی نێوان هەردوولا زیاتر بێت. بەگوێرەی زانیارییەکانی ئاڤا، ئێستا 400 کۆمپانیای بازرگانیی ئێرانی لە هەرێمی کوردستان ئۆفیسیان هەیە.

 

پەیوەندییەکان دەچنە قۆناغی دیکەوە

گەیلان حاجی سەعید، سەرۆکی ژووری بازرگانی و پیشەسازیی هەولێر بە ئاڤا نیوزی گوت: دوای سەردانی سەرۆکوەزیران بارزانی بۆ ئێران و سەردانی شاندێکی ئێران بۆ هەرێمی کوردستان، وردە وردە پەیوەندییە ئابووری و بازرگانییەکان لە نێوان هەرێمی کوردستان و ئێران ئاسایی دەبنەوە.