ئێران دژی نوێکردنەوەی پۆستی سوودانییە؛ ناکۆکییەکانی چوارچێوەی هەماهەنگی قووڵتر دەبنەوە

ئاڤا نیوز

لەگەڵ نزیکبوونەوەی هەڵبژاردنەکانی عێراق، ئێران بە فەرمی ڕەتیکردووەتەوە محەممەد شیاع سوودانی، سەرۆکوەزیرانی ئێستا، پۆستەکەی بۆ نوێ بکرێتەوە، ئەمەش ناکۆکییەکانی ناو چوارچێوەی هەماهەنگی شیعەکان قووڵتر دەکاتەوە و دۆخی سیاسی ئاڵۆزتر دەکات.

وێنە گەورەکە: عێراق بەرەو هەڵبژاردنێکی نوێ هەنگاو دەنێت، تا دێت ناکۆکییەکان بە دیاریکراوی لەنێوان لایەنەکانی چوارچێوەی هەماهەنگی قووڵتر دەبێتەوە. محەممەد شیاع سوودانی هەوڵ دەدات بۆ خولی دووەم بمێنێتەوە، بەڵام بەشێک لە لایەنەکانی نێو چوارچێوەی هەماهەنگی دژی ئەو هەوڵە دەجەنگن، بەتایبەت ئەو باڵانەی نزیکن لە تاران و نوری مالیکی.

بڵاوکراوەی فەرمی: بەگوێرەی چەند سەرچاوەیەک کە قسەیان بۆ ماڵپەڕی «العالم الجديد» کردووە، ئێران بە تەواوەتی ڕەتیکردووەتەوە سوودانی لە پۆستی سەرۆکوەزیراندا بمێنێتەوە. لە بەرامبەردا، واشنتن پاڵپشتی خۆی بۆ سوودانی دەردەبڕێت، بەتایبەت دوای دەستبەکاربوونی مارک ساڤایا وەک نێردەی فەرمی بۆ عێراق.

ئەوەی پێویستە بیزانیت: ئەم ناکۆکییە ڕەنگدانەوەی کێبڕکێی هەرێمی و نێودەوڵەتییە لەسەر هەژموون لە عێراقدا و ئاماژەیە بۆ ئاڵۆزی دۆخی سیاسی ناوخۆیی و کاریگەری ڕاستەوخۆی لەسەر سەقامگیریی وڵات و داهاتووی سیاسی.

بەگوێرەی سەرچاوە سیاسییەکان کە بۆ «العالم الجديد» دواون، "هێزەکانی چوارچێوەی هەماهەنگی پەیوەندییان بە تارانەوە کردووە بۆ وەرگرتنی هەڵوێستیان سەبارەت بە وەرگرتنی پۆستی سەرۆکوەزیران لەلایەن محەممەد شیاع سوودانییەوە". سەرچاوەکان ئاماژەیان بەوەدا "وەڵامی ئێران دوای چەندین هەفتە لە گفتوگۆکان ڕەتکردنەوە بوو، بەهۆی ئەوەی ئێران پێیوایە سوودانی نزیکتر بووەتەوە لە ئەمریکا".

هەر بەگوێرەی ڕاپۆرتەکەی «العالم الجديد» سەرچاوەکان ڕوونیان کردەوە، "وەڵامی ئێران بووە هۆی زیادبوونی ناکۆکییەکان لەناو هاوپەیمانیی ئاوەدانکردنەوە و گەشەپێدان کە سوودانی سەرۆکایەتی دەکات. هەندێک لە هێزەکانی نزیک لە ئێران لەناو هاوپەیمانییەکەدا دەستیان بە دوورکەوتنەوە لە ڕێنماییەکانی کردووە، ئەمەش کاریگەری لەسەر یەکێتیی هەڵوێستی سیاسیی هاوپەیمانییەکە لە هەڵمەتی هەڵبژاردندا داناوە."

سەرچاوەکان ئاماژەیان بەوەشداوە "ئێران چالاکییەکانی خۆی لە عێراقدا بە شێوەیەکی بەرچاو زیاد کردووە پێش هەڵبژاردنەکان، چونکە بڕیاریداوە نێردەیەکی ڕاستەوخۆ بۆ عێراق دابنێت دوای هەنگاوی کۆتایی واشنتن بۆ دانانی نێردەیەکی تایبەت بۆ خۆی."