لە سلێمانی کەسێک بەتۆمەتی سووتاندنی 60 هەزار دار دەستگیر دەکرێت

ئاڤا نیوز

 

نزیکەی 500 دۆنم پووش و پاوان لە سنووری سلێمانی سووتا، بەو هۆیەوە نزیکەی 60 هەزار دار زیانیان بەرکەوتووە، کەسێکیش بەتۆمەتی هەبوونی دەست لە ڕووداوەکە دەستگیر کراوە.

 

وێنە گەورەکە: لەگەڵ هاتنی وەرزی گەرما، ڕووداوەکانی ئاگرکەوتنەوە لەنێو سرووشت ڕوویان لە زیادبوون کردووە و ئەمساڵ هەزاران دۆنم دارستان و پووش و پاوان سووتاون.

 

ڕاگەیێنراوی فەرمی: بەڕێوەبەرایەتیی پۆلیسی دارستان و ژینگەی سلێمانی ڕایگەیاندووە، لە ئەنجامی کەوتنەوەی ئاگر لە سنووری گوندەکانی وێلەکە و دەربەندفەقەرە لە ناحیەی عەربەت، 500 دۆنم پووش و پاوان سووتاوە، بەپێی زانستی دارستان هەر دۆنمێک 120 داری سروشتی تێدایە، بەمپێیە 60 هەزار دار سووتاون.

 

زانیاریی زیاتر: بە هاوکاری تیمی فڕۆکەوانی پارێزگای سلێمانی و بنکەکانی بەرگریی شارستانیی عەربەت، ئازادی، تانجەرۆ و هاووڵاتییانی سنوورەکە توانرا ئاگرەکە لە ماوەی چوار کاتژمێردا کۆنترۆڵ بکەن. 

لەلایەکی دیکەوە: بەتۆمەتی هەبوونی دەست لە ڕووداوی ئاگرکەوتنەوەکە هاونیشتمانییەک دەستگیرکراوە.