لە سەرانسەری هەرێمی کوردستان هەفتانە دووجار ڕاگرتنی ئینتەرنێت دەستپێدەکات

ئاڤا نیوز

 

بەهۆی دەستپێکردنی تاقیکرنەوەکانی خولی یەکەمی پۆلی 12ی ئامادەیی، لە هەفتەی داهاتووەوە هەفتانە دوو ڕۆژ و لە هەر ڕۆژێکدا دوو کاتژمێر ئینتەرنێت دەبڕدرێت. 

 

وێنە گەورەکە: چەند ساڵێکە بەهۆی تاقیکردنەوەکانی پۆلی 12 ئامادەیی، لەسەر داوای وەزارەتی پەروەردە بڕیاری ڕاگرتنی هێڵی ئینتەرنێت لە سەرانسەری هەرێمی کوردستان بۆ ماوەیەک دەردەچێت.

 

لێدوانی فەرمی: دیلان ڕەشاد، گوتەبێژی وەزارەتی گواستنەوە و گەیاندن بە ئاڤا نیوزی گوت: لە هەفتەی داهاتووەوە  لە ڕۆژانی تاقیکردنەوە بۆ ماوەی دوو کاتژمێر، واتا لە 06:00 تاوەکو 08:00ی بەیانی سەرجەم هێڵەکانی ئینتەرنێت ڕادەگرین، ئەمەش لەپێناو دزەنەکردنی پرسیارەکانی تاقیکردنەوەیە.

 

ئەوەی پێویستە بیزانیت: ڕۆژی یەکشەممەی هەفتەی داهاتوو کە دەکاتە 23-6-2024، یەکەم تاقیکردنەوەی خولی یەکەمی پۆلی 12ی ئامادەیی دەستپێدەکات، لە هەفتەیەکدا دوو تاقیکردنەوە (یەکشەممان و چوارشەممان) دەکرێن و ڕۆژی 17-7-2024 کۆتایی بە تاقیکردنەوەکان دێت.