هەرێمی کوردستان بۆ دۆزینەوەی تەرمی کۆچبەران داوای هاوکاری لە ئیتاڵیا دەکات

ئاڤا نیوز

 

بەمەبەستی دۆزینەوەی تەرمی کۆچبەرەکان، حکومەتی هەرێمی کوردستان داوای هاوکاری لە ئیتاڵیا دەکات. 

 

لێدوانی فەرمی: ڕێزان حەمەساڵح، نوێنەری حکومەتی هەرێمی کوردستان لە ئیتاڵیا، بە ئاڤا نیوزی گوت: ئەو 11 کۆچبەرەی ڕزگاریان بووە یەکیان عەرەبی سوورییە و یەکێکیش عەرەبی کەرکووکە، ئەوانی تر کوردن و خەڵکی هەولێر، ڕاپەڕین و سۆرانن، ئەوانەی گیانیان لەدەست داوە تا ئێستا ئامارێکی تەواو لەبەر دەست نییە کە ژمارەیان چەندە، چونکە ناوەناوە تەرمی دیکە دەدۆزرێنەوە.

 

زانیاری زیاتر: حەمەساڵح ئەوەشی گوت: "دەبێت حکومەتی ئیتاڵیا بەفەرمی زانیاریمان لەسەر تەرمەکان پێبڵێت تا ڕایبگەیەنین، ئێمە لە ڕێگەی وەزارەتی ناوخۆوە ڕاستەوخۆ لەگەڵ لایەنی بەرامبەر لەسەر هێڵێن، بۆ گواستنەوەی تەرمەکانیش دەبێ دادوەرەکان ڕێمان پێ بدەن، دواتر لەسەر فەرمانی سەرۆکوەزیران بارزانی و بە بودجەی سەرۆکایەتیی ئەنجوومەنی وەزیران بۆ شاری خۆیان دەگەڕێنرێنەوە".

 

ئەوەی پێویستە بیزانیت: دوو منداڵ کە پورزای یەکن لەنێو بریندارەکانن و لەڕێگەی نوێنەرایەتیی حکومەتی هەرێمی کوردستانەوە گەڕێنراونەتەوە بۆ لای دایکی یەکێکیان کە لە ژیاندا ماوە.

 

ئەوەش بزانە: حکومەتی هەرێمی کوردستان ژوورێکی پێکهێناوە، کاری ئەمان گواستنەوەی تەرمی کۆچبەرانی کورد و دۆزینەوەی بێسەروشوێنەکان و هاوکاریکردنی ڕزگاربووەکانە بەو جۆرەی دەیانەوێت.