بەڵێنەکانی سەرۆکوەزیران بارزانی بۆ هەڵەبجە بەکوێ گەیشتوون؟

ئاڤا نیوز

لەكۆی نۆ داواكاری كە بەرپرسانی هەڵەبجە لە سەرۆكوەزیران بارزانییان كرد، سەرجەمیان جێبەجێكراون و لە كاركردندان. 

وێنە گەورەكە: كۆتایی مانگی شووباتی 2024 سەرۆكوەزیران بارزانی سەردانی پارێزگای هەڵەبجەی كرد و بەرپرسانی دەڤەرەكەش نۆ داواكارییان پێشكەشكرد، بەپێی بەدواداچوونێكی ئاڤا نیوز، دەردەكەوێت سەرجەم داواكارییەكان وەك خۆیان جێبەجێكراون و هەندێكیشیان لە جێبەجێكردندان.

زانیاریی بەدەستهاتوو: بەپێی بەدواداچوونی ئاڤا نیوز، دوای سێ مانگ لە داواكارییەكانی خەڵكی هەڵەبجە سەرجەم داواكارییەكان وەك خۆیان جێبەجێكراون.

درێژەی ڕاپۆرت

داواكارییەكان 
یەكەم: داواكاری بە قەزابوونی خورماڵ  لە جێبەجێكردندایە و ٪70ی كارەكانی تەواو بووە و لە نزیكترین كاتدا ڕادەگەیێنرێت.

دووەم: دامەزراندنی 500 كەس، دامەزراندنی ئەم كەسانە لە پارێزگای هەڵەبجە تەواو بووە و بەمزووانە ناوی ئەو كەسانە ڕادەگەیێنرێت كە وەردەگیرێن، هەرچەندە پارێزگای هەڵەبجە داوای كردووە زیاد بكرێت بۆ 617 كەس و تا ئێستا دوو هەزار كەس فۆڕمیان پڕكردووەتەوە.

سێیەم: داواكاری بۆ قیرتاوكردنی شەقامەكانی هەڵەبجە و خورماڵ و سیروان، ڕەزامەندی دراوە لەسەر قیركردنی 227 هەزار مەتر و 10 ملیار دیناری بۆ تەرخانكراوە.

 

چوارەم:دامەزراندنی كۆلێژی پزیشكی لە هەڵەبجە، ئەم داواكارییە ملیارێك و 500 ملیۆنی بۆ تەرخانكراوە و سەرقاڵی دانانی باڵەخانە و كارمەندن لە ساڵی خوێندنی 2024-2025 ەوە قوتابی وەردەگرێت.

پێنجەم:داواكاری جێبەجێكردنی ماستەرپلان، ئەم داواكارییە، 800 هەزار دۆلاری بۆدابینكراوە و دەستكراوە بەكارەكە.

شەشەم:گەڕانەوەی داهاتی خاڵە سنورییەكان بۆ پارێزگای هەڵەبجە. داواكراوە 20 تا25ی داهاتی هەردوو خاڵی سنووری هەڵەبجە بۆ پارێزگاكە بێت، لە سەرەتای مانگی داهاتوودا داواكارییەكە جێبەجێدەكرێت.

حەوتەم: بواری وەبەرهێنان
داواكاری بەرپرسانی هەڵەبجە بۆ وەبەرهێنان لە ناوچەكەدا لە بواری جێبەجێكردندایە و كاری تێدا دەكرێت.

هەشتەم: تەواوكردنی پردی تووە قوت

ئەم پردە لەلایەن حكومەتی هەرێمی كوردستانەوە، بەدوو گوژمە پارەی بۆ تەرخانكرا جاری یەكەم 500 ملیۆن دیناری بۆ تەرخانكراوە و جاری دووەمیش 30 ملیار345 ملیۆن دیناری بۆ تەرخانكراوە.

نۆیەم: پڕۆژەكانی شارەوانی هەڵەبجە
تا ئێستا لەلایەن سەرۆكوەزیران بارزانییەوە577 ملیۆن دیناری بۆ تەرخانكراوە و پڕۆژەكان جیبەجێدەكرێن.
زانیاریی زیاتر: نۆ داواكاری و یاداشتمان خستە بەردەستی سەرۆكوەزیران بارزانی، بۆ مێژوو دەڵێم " نۆ نا 20 داواكاری و یاداشتیش بوایە بەڕێزیان بۆی جێبەجێ دەكردین." پارێزگاری هەڵەبجە وای گوت.