ساڵح موسلیم بۆ ئاڤا: دەمانەوێت کۆنگرەی نەتەوەیی کورد لە باشوور بکرێت و سەرۆک بارزانی سەرۆکایەتی بکات

ئاڤا نیوز

ساڵح موسلیم، ئەندامی هاوسەرۆکایەتی پەیەدە لەسەر دۆخی ڕۆژئاوای کوردستان و هێرشەکانی سوپای عەرەبی سووریا بە ئاڤای ڕایگەیاند، دەمانەوێت ئاگربەست درێژبکرێتەوە و بە گرێبەستەوە پابەند بووینە، دەمانەوێت خۆمان ناوچەکانی ژێردەستی خۆمان بپارێزین و بەڕێوەیانببەین.

چیرۆکی سەرەکی: سەرەڕای ئاگربەست، هێرشەکانی سوپای عەرەبی سووریا بۆ سەر ڕۆژئاوای کوردستان بەردەوامن، بەهۆیانەوە سەدان شەڕڤان و هاووڵاتی سڤیل شەهید و بریندار بوون، سەدان هەزار هاونیشتمانیش ئاوارەبوون.

لێدوانی فەرمی: ساڵح موسلیم، ئەندامی هاوسەرۆکایەتی پەیەدە لەبارەی یەکهەڵویستی ماڵی کورد و هەوڵەکانی سەرۆک بارزانی و پشتیوانییەکانی بە ئاڤای وت، ئێمە چاومان لەوەیە بەمنزیکانە کۆنگرەی نەتەوەیی کورد لە باشوور بکرێت و هەر چوار پارچەی کوردستان تێیدا بەشداربن و سەرۆک بارزانیش سەرۆکایەتی بکات بۆ یەکبوونی زیاتری کورد. 

ئاماژەی بەوەشکرد، ئێستا لە کۆبانێ شەڕ وەستاوە و هێرشەکان شکستیان هێناوە، بەڵام دۆخی مرۆیی لەو شارە زۆر خراپە. بەشێک لە عەشیرەتە عەرەبەکان هەڵگەڕانەوە، بەڵام هێشتا بەشێکیان لەگەڵ ئێمەدان و لەگەڵ ئیمە شەڕ دەکەن.

ساڵح موسلیم ئەمانەشی وت:

٠ سبەی تۆم باراک دەچێتە دیمەشق، داوامان کردووە ئاگربەست درێژ بکرێتەوە.

٠ سوپاسی کوردی هەر چوار پارچەی کوردستان دەکەم بۆ ڕۆژئاوا بوونە یەک.

٠ دەزگای خێرخوازیی بارزانی هاوکارییەکانی گەیشتووەتە ڕۆژئاوا ئەوە جێگای پێزانینە و مێژوو ئەوەی سەلماندووە هەر کوردێک لە هەر شوێنێک  پێویستی بە هاوکاری بووبێت کورد بەهانای یەکترەوە چوونە.

٠ پڕۆژەکەی ئێمە پڕۆژەیەکی دیموکراسییە، بەڵام ئەوانەی ئێستا شەڕمان بەرامبەر دەکەن دیموکراسی بە کوفر دەزانن.

٠ بابەتی پەروەردە و مافی ژن لای ئێمە هێڵی سوورە.

٠ خەڵکی کۆبانێ جارێکی دیکە سەلماندی ڕاپەڕینێکی نوێیان کرد، ئێمە دەمانەوێن خۆمان ناوچەکانی خۆمان بەڕێوەببەین.

٠ هەرکاتێک ئەوان بیانەوێت دەستدرێژی بکەن کورد بەیەک دەنگ دژیان دەوەستینەوە.