دەزگای خێرخوازیی بارزانی: ئەمڕۆ نەوت و ژەمەخواردنی گەرم بەسەر ئاوارەكانی ڕۆژئاوا دابەشكراوە

ئاڤا نیوز

سەرۆكی دەزگای خێرخوازیی بارزانی دەڵێت، لەسەر ڕاسپاردەی سەرۆك بارزانی و سەرۆكوەزیرانی هەرێمی كوردستان، بەردەوامین لە كۆمەككردنی خەڵكی ڕۆژئاوای کوردستان؛ ئەمڕۆ جگە لە دابەشكردنی دوو ژەمەخواردنی گەرم بەسەر زیاتر لە هەزار خێزان، هاوكات بڕی 100 هەزار لیتر نەوتی سپیش دابەشكراوە.

چیرۆکی سەرەکی: بەهۆی هێرش و پەلامارەکانی سوپای عەرەبی سووریا بۆ سەر ڕۆژئاوای کوردستان، سەدان هەزار هاونیشتمانی کورد ئاوارە بوون، بەشێکیان لە قامیشلۆ لەنێو مزگەوت و قوتابخانەکاندان.

لێدوانی فەرمی: موسا ئەحمەد، سەرۆكی دەزگای خێرخوازیی بارزانی بە ئاڤای وت، هەر هاوكارییەك كە ئامادە دەكرێت، دەستبەجێ بە هاووڵاتیانی دەگەیەنین، ئەمڕۆ دوو ژەمەخواردنی گەرمیان بۆ زیاتر لە هەزار خێزانی ئاوارەی نیشتەجێی نێو مزگەوت و قوتابخانەکانی قامیشلۆ دابین كردووە، تەنانەت چەندین خێزان بەهۆی نەبوونی شوێن لەنێو ئۆتۆمبێلەكانیان ماونەتەوە و تیمەكانمان خواردن و هاوكاریی پێویستیان پێ گەیاندوون.

زانیاریی زیاتر: سەرۆكی دەزگای خێرخوازیی بارزانی ڕاشیگەیاند، ئەو سووتەمەنییەی كە سەرۆكوەزیران مەسرور بارزانی بڕیاری لەسەر ناردنی بۆ ڕۆژئاوا داوە، ئەمڕۆ گەیشتووە و بڕی 100 هەزار لیتر نەوتی سپیمان بەسەر خانەوادەكان دابەشكردووە و هەر خانەوادەیەك بڕی 40 لیتری پێ دراوە، لە دابەشكردنی نەوتی سپی بەردەوام دەبین و 100 هەزار لیتری دیكە دابەش دەكەین.

لەلایەكی دیكەوە: شاندێكی ئیدارەی خۆسەر و تەڤگەری ئازادی سەردانی نووسینگەی قامیشلۆی دەزگای خێرخوازیی بارزانییان كرد و پێزانینی خۆیان بۆ هەوڵەكانی دەزگاكە دەربڕی بەرامبەر پێشكەشكردنی هاوكاریی جۆراوجۆر بە دانیشتووانی ڕۆژئاوا.