داهاتی بەندەری ئوم قەسری باکوور لە مانگێکدا 31 ملیار دینار بووە

ئاڤا دیجیتاڵ

 

بەندەری ئوم قەسری باکوور کە یەکێکە لە گرنگترین بەندەرەکانی عێراق، تەنیا لە مانگی ڕابردوودا، داهاتەکەی لە 31 ملیار دینار زیاتر بووە.

 

بۆچی گرنگە: بەندەرەکانی ئوم قەسری باکوورو باشوور لە گرنگترین بەندەرەکانی عێراقن، لە بەسرەی باشووری عێراقن، ساڵی 1930 بونیاتنراون، 80% کاڵا و کەلوپەلی هاوردەکراوی پێدا تێدەپەڕێت.

 

لێدوانی فەرمی: فەرحان فەرتووسی، بەڕێوەبەری گشتیی کۆمپانیای بەندەرەکانی عێراق ڕایگەیاند، لە مانگی کانوونی دووەمی 2024 داهاتی بەندەری ئوم قەسری باکوور زیاتر بووە لە 31 ملیار دیناری عێراقی.

 

کاریگەری و لێکەوتەکانی: بەندەرەی ئوم قەسری باکوور، یەکێکە لە بەندەرە پێشکەوتووەکانی عێراق، بەم دواییانە ژێرخانەکەی نۆژەنکرایەوە و پرۆژەی نوێی تێدا دروستکران، ئەوەش کاریگەریی ئەرێنی لەسەر کارەکانی و زیادبوونی داهاتەکەی هەبووە.

 

ئەوەی لەبارەیەوە دەگوترێت: بەگوتەی ژمارەیەک پەرلەمانتاری عێراق، بەندەرەکان و دەروازە سنوورییەکان لەلایەن گرووپە چەکدارەکانی سەر بە حزبە دەسەڵاتدارەکانی نزیک لە ئێرانەوە کۆنترۆڵکراون، ڕێژەی گەندەڵیی ئیداریی و دارایی تێیاندا زۆرە، زۆرجار کاڵا و کەلوپەلی بێ کوالێتی و ماددەی هۆشبەر لەرێگەیانەوە دەهێنرێتە عێراق.