لە ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم زەوی بەسەر پێشمەرگە دابەشدەکرێت

ئاڤا دیجیتاڵ

 

حکومەتی عێراق ڕەزامەندی له‌سه‌ر پێدانی زه‌وی بە پێشمەرگە و ئاسایشی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم داوه‌؛ هاشێوه‌ی هێزه‌ چه‌كداره‌كانی عێراق زه‌وی به‌ هێزه‌ كوردییه‌كانی دانیشتووی ئه‌م ناوچه‌نه‌‌ ده‌درێت. 

 

لێدوانی فه‌رمی: "وەزیری ئاوەدانکردنەوە و نیشتەجێبوونی عێراق، ڕەزامەندی داوە لەسەر ئەوەی هاوشێوەی سوپا و حەشدی شەعبی، هێزەکانی پێشمەرگە و ئاسایشی ناوچە کوردستانییەکانی دەرەوەی ئیدارەی هەرێم، زەوی نیشتەجێبوونیان پێبدرێت". ئەحمەد عومەر، سەرۆکی شارەوانیی کەرکووک به‌ ئاڤا نیوزی گوت. 

 

فه‌همی بورهان، سه‌رۆكی ده‌سته‌ی گشتیی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم به‌ ئاڤا نیوز گوت: "چاودێریی وردی پرۆسه‌ی دابه‌شكردنی ئەو زەوییانە دەکەین، بۆ ئه‌وه‌ی هاوشێوه‌ی پرۆسه‌ی دامه‌زراندن و پڕۆژه‌ خزمه‌تگوزارییه‌كانی دیکە، مافی كورد له‌م ناوچه‌نه‌ پێشێل نه‌كرێت".

 

ئه‌وه‌ی پێویسته‌ بیزانیت: له‌ چه‌ند ڕۆژی داهاتوودا گشتاندن بە بڕیاری دابه‌شكردنی زەوی نیشتەجێبوون دەدرێت و بڕیاره‌كه‌ له‌ سنووری پارێزگاكانی کەرکووک، نەینەوا، سەلاحەدین و دیالە جێبەجێ دەکرێت.

 

باکگراوند: به‌بڕیاری وەزیری ئاوەدانکردنەوە و نیشتەجێبوونی عێراق هەر ئەندامێکی هێزەکانی پێشمەرگە و ئاسایش، له‌ ساڵی 1957ـەوە دانیشتووی ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم بێت، هاوشێوەی هێزه‌ چه‌كداره‌كانی عێراق مامەڵەیان لەگەڵ دەکرێت.