شاندێک لەبارەی دابینکردنی مووچە بۆ خێزانە هەژارەکان دەچێتە بەغدا

ئاڤا نیوز

ئەنجوومەنی وەزیران ڕەزامەندی دەدات لەسەر چوونی شاندێکی وەزارەتی کار و کاروباری کۆمەڵایەتی بۆ بەغدا، بەمەبەستی گفتوگۆکردن لەسەر دابینکردنی مووچە بۆ خێزانە هەژارەکان و هاوتاکردنی مووچەی کەمئەندامان.

وێنە گەورەکە: پێشتر چەندجارێک وەزارەتی کار و کاروباری کۆمەڵایەتی داوای کردووە هاوشێوەی عێراق مووچە بۆ خێزانە هەژارەکانی هەرێمی کوردستان دابین بکرێت، بەڵام تاوەکو ئێستا ڕەزامەندی لەسەر داواکارییەکە نەدراوە.

لێدوانی فەرمی: کوێستان محەممەد، وەزیری کار و کاروباری کۆمەڵایەتی بە ئاڤا نیوزی گوت:  شاندەکە لەبارەی سێ بابەت گفتوگۆ لەگەڵ حکومەتی  عێراق دەکات؛ تۆماری تازەی کەمئەندامان، هاوتاکردنی مووچەی کەمئەندامان و بڕینەوەی مووچە بۆ چاودێریی خێزان.

قووڵتر: کوێستان محەممەد پێیوایە مادام بودجە و مووچەی هەرێمی کوردستان لە بەغداوە دێت، خێزانە هەژارەکانیش مافیانە لە بودجەی گشتیی عێراق سوودمەند بن.

ژمارەکان وادەڵێن: بەپێی ئامارەکانی وەزارەتەکە 250 هەزار خێزانی هەژار لە هەرێمی کوردستان هەن، ناوی کەمئەندامانیشی تێدایە.

ئەوەی پێویستە  بیزانیت: حکومەتی عێراق 220 هەزار دیناری بۆ هەر خێزانێکی هەژار دیاریکردووە، هەمان بڕە پارەی مانگانە بۆ خێزانە هەژارەکانی هەرێمی کوردستانیش داواکراوە.