پارتی دەیەوێت سەرۆک و جێگری ئەنجوومەنی پارێزگای نەینەوا بگۆڕێت

ئاڤا نیوز 

سەرۆکی فراکسیۆنی پارتی لە ئەنجوومەنی پارێزگای نەینەوا ڕایگەیاند، کار لەسەر گۆڕینی سەرۆک و جێگری ئەنجوومەنەکە دەکەن، تا ئەو کاتەش بەشداری هیچ کۆبوونەوەیەک ناکەن.

وێنە گەورەکە: پێشتر ئەنجوومەنی پارێزگای نەینەوا بڕیاری گۆڕینی سەرجەم پۆستە ئیدارییەکانی پارێزگاکەی دا، ئەوەش کاردانەوە و ناڕەزایەتی زۆری بەدوادا هات.

لێدوانی فەرمی: ئەحمەد کیکی، سەرۆکی فراکسیۆنی پارتی لە ئەنجوومەنی پارێزگای نەینەوا بە ئاڤا نیوزی گوت: بڕیاربوو ڕۆژی 18-7-2024، ئەنجوومەنی پارێزگا کۆببێتەوە، بەڵام دواتر هەڵوەشایەوە، کۆبوونەوەکەش بکرایە ئێمە بەشداریمان نەدەکرد، چونکە تا ئێستا سەرۆک و جێگری ئەنجوومەنەکە لەسەر بڕیاری گۆڕانکارییە ئیدارییەکان سوورن.

زانیاریی زیاتر: کار لەسەر گۆڕینی سەرۆکی ئەنجوومەن و جێگرەکەی دەکەین، چونکە هەڵە و پێشێلی یاسایان کردووە. ئەحمەد کی کی وا دەڵێت.

ئەوەی پێویستە بیزانیت: لە دەستەی هەماهەنگی لە ئەنجوومەنی وەزیرانی عێراق نووسراوێک ئاراستەی پارێزگای نەینەوا کراوە، ئاماژە بە هەڵوەشاندنەوە و جێبەجێنەکردنی بڕیاری ئەنجوومەنی پارێزگا بۆ گۆڕینی یەکە ئیدارییەکان کرا، بۆیە پارێزگار بەو نووسراوە پابەندبوو و ڕایگەیاند " گۆڕانکارییەکان ناکات".