رێڤەبەریا کۆمپانیێن دهۆکێ: ل دهۆکێ سێ هزار و 900 کۆمپانی هەنە و چەندین دەرفەتێن کاری پەیداکرینە

ئاڤا دیجیتاڵ

 

رێڤەبەریا کۆمپانیێن دهۆکێ راگەهاند، ل دهۆکێ سێ هزار و 900 کۆمپانی هەنە کو زێدەتری 300 ژ وان بیانینە و چەندین دەرفەتێن کاری پەیداکرینە.

 

شێروان حیتۆ، رێڤەبەرێ رێڤەبەریا کۆمپانیایێن دهۆکی بۆ ئاڤا میدیا راگەهاند: "سێ هزار و 900 کۆمپانی ل پارێزگەها دهۆکێ هەنە و ژ وێ هژمارێ ژی 307 کۆمپانی بیانینە، ژ ولاتێن تورکیا، ئەلمانیا و رۆمانیا هاتنە.

 

ژ رۆژا  8-1- 2023 و تا نوکە، وان وەک رێڤەبەریا کۆمپانیێن دهۆکێ 105 کۆمپانیا ب ناڤێن بازرگانی ڤە داینە خودانکاران، بۆ کارێن جۆربجۆر وەک (جوانکاری، نڤیسینگەهێن کاری، نڤیسینگەهێن گەشتوگوزاری، مارکێت و فرنان). شێروان حیتۆ ، ئەڤە بۆ ئاڤا میدیا گوت.

 

هاتنا رێژەیەکا زۆرا کۆمپانیێن بیانی بۆ هەرێما کوردستانێ و ب تایبەت ل پارێزگەها دهۆکێ دەرفەتێن کاری ب رەنگەکێ باش زێدە کرینە. ئەڤە ژی ب گوتنا رێڤەبەرێ کۆمپانیێن دهۆکێ.

 

زانیاری...  د سالا 2023 دا، بتنێ ل هەرێما کوردستانێ 221 کۆمپانیا هاتینە دامەزراندن کو دوو ژ وان بیانی بووینە.

 

دوماهیک هێل... ب بڕیارا حکومەتا هەرێما کوردستانێ تۆماركرنا كۆمپانییان بوویه‌ سیسته‌مێ ئه‌لیكترۆنى، دگەل ڤێ ژی مەزاختنێن دامه‌زراندنا كۆمپانییان ژى ب رێژه‌یا 80%ێ هاتینه‌ كێمكرن، ئەڤ بزاڤێن کابینەیا نەهێ ژی ب مەرەما راکێشانا کۆمپانیێن بیانییە بۆ کارکرن د ناڤ هەرێما کوردستانێ دا، ڤێ پلانێ ژی ئەنجامێن باش هەبووینە و بوویه‌ ئه‌گه‌ر رێژه‌یه‌كا زێده‌تر یا كۆمپانییێن بیانى بۆ هه‌رێما كوردستانێ‌ بهێن.