گەنجێکی هەڵەبجەیی پڕۆژەیەکی گەشتیاریی لە ڕووباری سیروان دروست دەکات

ئاڤا نیوز

گەنجێکی خەڵکی پارێزگای هەڵەبجە، لە نێوان ناوچەی "شەمێران و نەورۆڵی" دەستپێشخەرییەکی ناوازەی ئەنجامداوە و خانوویەکی گەشتیاری لە ناوەڕاستی ئاوی ڕووباری سیروان دروستکردووە.

چیرۆکی سەرەکی: گەنجێکی هەڵەبجە بۆ یەکەمجار لەسەر ئاستی عێراق و هەرێمی کوردستان، پڕۆژەیەکی گەشتیاری دەگمەن جێبەجێ دەکات کە بریتییە لە دروستکردنی خانوویەک لە ناوەڕاستی ڕووباری سیرواندا. پڕۆژەکە خزمەتگوزاری تەواوی تێدایە و بووەتە جێی سەرنجی گەشتیاران.

لێدوانی فەرمی: شکار موحسین، خاوەنی پڕۆژەکە بە ئاڤای وت، "خواستێکی زۆر لەسەر پڕۆژەکە هەیە و گەشتیاران سەرەی بۆ دەگرن، هەر بۆیە لە بەرنامەمدایە پڕۆژەکە فراوان بکەم و پێنج خانووی دیکەی هاوشێوە لەسەر ڕووبارەکە دروست بکەم."

ئەبوبەکر حەسەن، کە وەک گەشتیارێک سەردانی شوێنەکەی کردووە، بە ئاڤای وت، "تەنیا خواردنمان لەگەڵ خۆمان هێناوە و هەموو شتێکی لێیە، تەنانەت شوێنی تایبەت بە برژاندنیشی تێدایە. بەڕاستی ئەزموونێکی زۆر نوێ و لەبیرنەکراوە."

زانیاریی زیاتر: خانووەکە کە بەتەواوی لەناو ئاودایە، هەموو پێداویستییەکی ژیانی تێدا دابین کراوە. کارەباکەی دۆستی ژینگەیە و لە ڕێگەی وزەی خۆرەوە دابین دەکرێت، هەروەها خزمەتگوزارییەکانی وەک هێڵی ئینتەرنێت، سپلیت، حەمام، دەستشۆر و ئاوی گەرمی تێدایە. یەکێک لە تایبەتمەندییە گرنگەکانی ئەم پڕۆژەیە ئەوەیە کە ئاوی ڕووبارەکە دەپاڵێورێت و بە ڕێژەی 96% دەکرێتە ئاوی خاوێن بۆ بەکارهێنان.

گواستنەوەی گەشتیاران لە کەناری ڕووبارەکەوە بۆ ناو خانووەکە بە بەلەمێکی تایبەت دەکرێت کە ئەوەش خۆی لە خۆیدا گەشتێکی چێژبەخشە، هاوکات بەلەمی فریاگوزاریش بۆ هەر دۆخێکی لەناکاو ئامادە کراوە. شوێنەکە قەرەباڵغییەکی زۆری لەسەرە و خێزانەکان بە نۆرە شوێنەکە دەگرن.