گه‌نجێكی كورد لە هەولێرەوە به‌ فێڵ براوه‌ بۆ شەڕی ئۆكرانیا و بێسەروشوێنە

ئاڤا نیوز

گەنجێکی تەمەن 21 ساڵی دانیشتووی دەڤەری سیدەکان، دوای ئەوەی بە بەڵێنی کار و مووچەی بەرز لەلایەن گرووپێکەوە هەڵدەخەڵەتێنرێت، دەبردرێتە ڕووسیا و دەکرێتە سەرباز لە شەڕی دژ بە ئۆکراینادا. ماوەی چەند مانگێکە پەیوەندی بە خێزانەکەیەوە پچڕاوە و باوکی داوای هاوکاری لە لایەنە پەیوەندیدارەکان دەکات.

چیرۆکی سەرەکی: مەتین وەهاب، گەنجێکی خەڵکی گوندی "دەشتە هێرت"ـە لە دەڤەری سیدەکان. لە مانگی چواری ئەمساڵەوە بۆ بژێوی ژیان ڕووی لە شاری هەولێر کردووە و لە شوێنێکی شۆردنی ئۆتۆمبێل کاری کردووە.

لەو ماوەیەدا گرووپێکی عەرەب لە شارۆچکەی پردێ پەیوەندییان بە مەتینەوە کردووە و پێیان وتووە "کارێکی باشمان هەیە و مانگانە 20 وەرەقە (2 هەزار دۆلار)ـت پێ دەدەین". مەتین باوەڕی پێکردوون و بە ماڵەوەی ڕاگەیاندووە کە دەچێت بۆ پردێ.

چی ڕوویدا: دوای ئەوەی مەتین لە بازگەی پردێ تێدەپەڕێت و دەچێتە ئەودیو، مۆبایلەکەی دادەخرێت و خێزانەکەی هیچ سۆراخێکیان دەستناکەوێت تاوەکو مانگی هەشت. لەو کاتەدا مەتین گرتەیەکی ڤیدیۆیی بۆ براکەی دەنێرێت و تێیدا دەڵێت: "من لە ئۆکرانیام، لە شاری باخمووت، لەگەڵ سوپای ڕووسیا شەڕی ئۆکرانیا دەکەم".

لەدوای ناردنی ئەو ڤیدیۆیە، پەیوەندی مەتین بەتەواوی پچڕاوە و خێزانەکەی تا ئێستا نازانن کوڕەکەیان لە ژیاندا ماوە یان لە بەرەکانی جەنگ کوژراوە.

لێدوانی فەرمی: وەهاب، باوکی مەتین بە ئاڤای وت، "کوڕەکەم بەنیازی کار چووە، بەڵام بەداخەوە هەڵخەڵەتێنراوە. دوای ئەوەی چووەتە ئەودیو پردێ، ئاگامان لێی نەما تا ئەو کاتەی ڤیدیۆکەی نارد و وتی لە باخمووت شەڕ دەکەم. ئێستا نازانین کوژراوە یان ماوە، تەنیا خەفەت دەخۆین."

باوکی مەتین داوایەک ئاراستەی لایەنەکان و هاووڵاتیان دەکات و دەڵێت: "داوا لە لایەنە پەیوەندیدارەکان دەکەم بە دەنگمانەوە بێن و هاوکاریمان بکەن بۆ ئەوەی کوڕەکەم بدۆزینەوە و بیهێنینەوە. هەروەها داوا لە دایک و باوکان دەکەم زۆر ئاگاداری ڕۆڵەکانیان بن، بۆ ئەوەی وەک مەتین هەڵنەخەڵەتێنرێن و دایک و باوکیان جەرگ سووتاو نەکەن."