شارەزایەکی ئەمنیی: ڕەنگە ئێران هێرش نەکاتە سەر ئیسرائیل و بابەتەکە دابخات

ئاڤا نیوز

 

شارەزایەکی ئەمنی و ستراتیژی بە دووری دەبینێت ئێران وەڵامێکی تووندی بۆ ئیسرائیل هەبێت و ئاماژە بە چەند سیناریۆیەک دەدات کە ڕەنگە ئێران لە دژی ئیسرائیل بەکاری بهێنێت.

 

وێنە گەوەكە: دوای كوشتنی ئیسماعیل هەنیە، ئێران بەنیازە هێرشی مووشەكی وەک تۆڵەسەندنەوە بكاتە سەر خاكی ئیسرائیل و تێلئەڤیڤیش هەڕەشەی تۆڵەسەندنەوە لە ئێران دەكات.

 

لێدوانی فەرمی: ئەعیاد تۆفان، شارەزای ئەمنی و ستراتیژی بە ئاڤا نیوزی ڕاگەیاند: "پێشبینی ناکەم ئێران وەڵامێکی تووندی دژ بە ئیسرائیل هەبێت، بە تایبەتیش کاتێک ئەمریکا  قاسم سولەیمانی کوشت، ترەمپ بە ڕوونی گوتی، لەسەر ژمارەی ئامانج و کات و شوێن لەسەر وەڵامدانەوە ڕێکەوتین، ئایا لەسەر کوشتنی هەنییە وەڵام دەداتەوە؟!"

 

ئەوەی پێشبینی دەکرێت: ئەو شارەزا ئەمنی و ستراتیژییەی عێراق چوار سیناریۆ بۆ وەڵامی ئێران دژی ئیسرائیل دەخاتەڕوو:

 

یەکەم: بەتووندی وەڵام بداتەوە ئەمەش ناوچەکە بەرەو جەنگێکی گەورە دەبات کە ئێران نایەوێت ئەمە ڕوو بدات و ئەوکات ئیسرائیل وەڵام دەداتەوە و ئەمریکاش یارمەتیی دەدات و بەهەمانشێوە فەرەنسا و ئەڵمانیا و کەنەداش دێنە پاڵ ئیسرائیل، بۆیە ئەم سیناریۆیە دوورە.

دووەم: وەکو ئەوەی قاسم سولەیمانی ڕێکەوتن بکرێت بۆ وەڵامدانەوەی سنووردار.

سێیەم: لە ڕێگەی میلیشیا نزیکەکانی وەڵامی ئاوێتە بداتەوە، حوسییەکان لە یەمەن و حیزبوڵڵا لە باشووری لوبنان و میلیشیاکان لە عێراق و سووریا هێرش بکرێتە سەر ئیسرائیل.

سیناریۆی چوارەم،  ئەمە ئەگەری ڕوودانی زۆرە، ئەویش هەمووان بێدەنگ بن و بابەتەکە کۆتایی پێبێت.