" هێشتا ژنان و كچانی ئێزدی لە کەمپی هۆل کڕین و فرۆشتنیان پێوە دەکرێت"

ئاڤا نیوز

ڕاوێژكارێكی سەرۆكایەتی هەرێمی كوردستان دەڵێت، وێڕای شکستپێهێنانی داعش، بەڵام هێشتا نەهامەتییەکانی کوردانی ئێزدی کۆتایی نەهاتووە، "لە کەمپی هۆل کڕین و فرۆشتن بە کچ و ژنانی ئێزدییەوە دەکرێت".

وێنە گەورەکە: لە ساڵی 2014 دوای داگیرکردنی شنگال لەلایەن داعشەوە، بە هەزاران کوردی ئێزدی لەو سنوورە کوژران و زیندەبەچاڵکران، ژن و كچەكانیشیان بەرەو سووریا و مووسڵ بران.

لێدوانی فەرمی: خەیری بۆزانی، ڕاوێژکار لە سەرۆکایەتی ھەرێمی کوردستان بە ئاڤا نیوزی ڕاگەیاند:" هێشتا بەشێك لەو کچ و ژنانەی 2014 لەلایەن داعشەوە ڕفێندرابوون لە کەمپی هۆل ماون و کڕین و فرۆشتنیان پێوە دەکرێت، دەسەڵاتی کەمپەکە هاوکار نییە بۆ گەڕاندنەوەیان".

زانیاریی زیاتر: "زۆربەی ڕفێنراوانی کوردی ئێزدی ئێستا لە کەمپی هۆلن لە پارێزگای حەسەکەی رۆژئاوای کوردستان، لە دۆخێکی خراپدان و دەچەوسێنرێنەوە". خەیری بۆزانی وا دەڵێت.

ئەوەی پێویستە بیزانیت: تا ئێستا چارەنووسی دوو هەزار و 601 ڕفێنراو  نادیارە، کە هەزار و 235 لە ڕەگەزی مێن و هەزار و  366 نێرن.