بەغدا هەفتەی داهاتوو مووچەی مانگی حەوتی هەرێمی كوردستان ڕەوانە دەکات

ئاڤا نیوز 

سەرچاوەیەک لە وەزارەتی دارایی ڕایگەیاند، بەهۆی تەواوبوونی دەوامی وەزارەتی دارایی و بانکی ناوەندیی عێراق، ئەمڕۆ ژمێریاری وەزارەتی دارایی نەیتوانی نووسراوی بۆ بانک بکات.

لێدوانی فەرمی: سەرچاوەیەک لە وەزارەتی دارایی حکومەتی هەرێمی کوردستان بە ئاڤا نیوزی گوت: بەهۆی تەواو بوونی کاتی دەوامی فەرمی هێشتا نووسراو لە ژمێریاری وەزارەتی دارایی عێراقەوە بۆ بانک نەکراوە، تا پارە بخرێتە سەر هەژمارەی وەزارەتی دارایی حکومەتی هەرێمی کوردستان، ئێستا ئێمەش چاوەڕێی ئەوەین.

زانیاريی زیاتر: ئەمڕۆ دەوام نەما تا نووسراو بکەن و هەینی و شەممەش دەوام نییە، بۆیە بابەتەکە دەکەوێتە هەفتەی داهاتوو. سەرچاوەكەی وەزارەتی دارایی وای گوت.

ئەوەی پێویستە بیزانیت: محەممەد شیاع سوودانی، سەرۆکوەزیرانی عێراق ڕەزامەندی لەسەر خەرجکردنی سەرجەم مووچەی مانگی حەوتی فەرمانبەران و خانەنشینان و هێزە ئەمنییەکانی هەرێمی کوردستان دەربڕیوە.

باکگراوند: دوو ڕۆژ پێش ئێستا تەیف سامی، وەزیری دارایی عێراق ئاشکرای کرد ڕۆژی پێنجشەممە مووچەی فەرمانبەرانی مەدەنی هەرێمی کوردستان ڕەوانە دەکەن.