خەزعەلی: لەبەرامبەر پۆستی پارێزگار یەكێتی ڕازی بوو بە عێراقیبوونی كەركووک

ئاڤا نیوز

 

ئەمینداری گشتی عەسائیبی ئەهلی حەق نهێنی نوێ لەبارەی گفتوگۆکانی پێکهێنانی حکومەتی خۆجێی کەرکووک لەگەڵ یەکێتی ئاشکرا دەکات، دەڵێت " یەکێتی رازی بوو بە پاراستنی ناسنامەی عێراقیبوونی شارەکە".

وێنە گەورەکە: لە ڕۆژی 10-08-2024، لە بەغدا بەبێ ئامادەبوونی پارتی، پێکهاتەی تورکمان و بەشێکی هاوپەیمانیی عەرەبی، پارێزگار و سەرۆکی ئەنجوومەنی پارێزگای کەرکووک هەڵبژێردران و قەیس خەزعەلی نهێنی ڕێکەوتنەکە ئاشکرا دەکات.

ڕاگەیێنراوی فەرمی: قەیس خەزعەلی، ئەمینداری گشتی عەسائیبی ئەهلی حەق لە چاوپێکەوتنێکی تەلەڤزیۆنیدا لەگەڵ میدیای حیزبەكەی ڕایگەیاند: "لای ئێـمە عێراقی بوونی کەرکووک خاڵێکی سەرەکییە بۆ ئەوەی پشتیوانی هەر ڕێککەوتنێک بکەین لەبارەی پێکهێنانی حکومەتی خۆجێيی کەرکووک و یەکێتی بە ڕوونی پابەندبوونی خۆی بە عێراقیبوونی کەرکووک ڕاگەیاند و دانی پێداناوە".

زانیاریی زیاتر: قەیس خەزعەلی گوتیشی: "یەکێتی ماوەیەکی درێژە هاوپەیمانمانە و کارێکی سرووشتییە ئێمە بەدەم هاوپەیمانی خۆمانەوە بچین".

ئەوەی پێویستە بیزانیت: "پارتی دیموکراتی کوردستان ئامادە نییە دان بە عێراقیبوونی کەرکووکدا بنێت، هەرگیز گوێمان لێنەبووە ئەو کارە بکات نە بەئاشکرا و نە بە نهێنی، پارتی باوەڕی وایە کەرکووک کوردستانی یە". قەیس خەزعەلی ئەمەشی گوت.