پێشەوا هەورامانی: کابینەی نۆیەم سەلماندی جیاوازی لەنێوان ناوچەکان ناکات

ئاڤا نیوز

گوتەبێژی حکومەتی هەرێمی کوردستان ڕایدەگەیێنێت، کابینەی نۆیەم بە کردار سەلماندوویەتی لە خزمەت هەموو خەڵكی کوردستانە و، بێ جیاوازی پڕۆژەی ستراتیژی لە سەرجەم پارێزگا و ئیدارە سەربەخۆکان جێبەجێ کردووە.

وێنە گەورەکە: سەرەڕای دروستکردنی ئاستەنگی دارایی لەلایەن حکومەتی عێراقەوە، بەڵام کابینەی نۆیەم بەسەرۆکایەتیی سەرۆکوەزیران بارزانی، لە گەیاندنی خزمەتگوزاری و ڕاگەیاندنی پڕۆژەی ستراتیژی لە هەرێمی کوردستان نەوەستاوە.

لێدوانی فەرمی: پێشەوا هەورامانی، گوتەبێژی حکومەت بە ئاڤا نیوزی گوت: " جیاوازی ئەم کابینەیە ئەوەیە سه‌رۆكوه‌زیران بارزانی باوه‌ڕی به‌ پڕۆژه‌ی گه‌وره‌ و ستراتیژییه‌ بەمەبەستی بنیاتنانی ژێرخانێكی به‌هێز بۆ كوردستان، لەم کابینەیەدا بۆ یەکەمجار سیاسەتی ئاو داڕێژرا، دروستکردنی پۆند و بەنداو گەیشتە قۆناغێکی گرنگ، شارەکان بوون بە خاوەن سایلۆی خۆیان و ئێستا جووتیاران ترسیان لە ساغبوونەوەی بەرهەمەکانیان نییە".

قووڵتر: پێشەوا هەورامانی جەخت دەکاتەوە، پڕۆژه‌كانی حكوومه‌ت پینه‌وپه‌ڕۆ نه‌بوون، هەموو ئەو پڕوپاگەندانە بەدرۆخرانەوە کە دەیانگوت ئەم کابینەیە جیاوازی لەنێوان شارەکان دەکات، سەرۆکوەزیران دووجار سەردانی پارێزگای هەڵەبجەی کرد و داواکارییەکانی خەڵکی سنوورەکەی جێبەجێ  کرد.

لەلایەکی دیکەوە: لەبارەی خزمەتگوزاری بۆ ئیدارە سەربەخۆکان گوتەبێژی حکومەت دەڵێت: "ساڵی پار خەڵکی کفری خۆپێشاندانیان کرد و داوای خزمەتگوزارییان دەکرد، سەرۆکوەزیران تیمێکی پێکهێنا و سەرجەم داواکارییەکانی جێبەجێ کردن. سەردانی پارێزگای سلێمانیشی کرد، داوای شۆڕکردنەوەی کۆمەڵێک دەسەڵاتییان کرد، سەرۆکوەزیران هەموو داواکارییەکانی جێبەجێ کردن".