سەرۆککۆمار لەبارەی هەڵەبجە داوایەک ئاراستەی پەرلەمانی عێراق دەکات

ئاڤا نیوز

بڕیارە دوای کۆتاییهاتنی چلەی ئیمامی حوسێن دانیشتنەکانی پەرلەمانی عێراق دەستپێبکەنەوە، سەرۆکایەتیی کۆمار داوای کردووە پڕۆژەیاسای بەپارێزگاکردنی هەڵەبجە بخرێتە بەرنامەی کارەوە.

وێنە گەورەکە: لە 13ی ئایاری 2023ەوە پڕۆژەیاسای بەپارێزگابوونی هەڵەبجە لە ئەنجوومەنی وەزیرانی عێراقەوە نێردراوە بۆ پەرلەمانی عێراق.

لێدوانی فەرمی: هاوڕێ تۆفیق، ڕاوێژکاری سەرۆکایەتیی کۆماری عێراق بە ئاڤا نیوزی ڕاگەیاند: سەرۆککۆمار نامەیەکی تایبەتی بۆ موحسین مەندەلاوی، سەرۆکی کاتی پەرلەمانی عێراق ناردووە، تێیدا داوا دەکات پرسی بەپارێزگاکردنی هەڵەبجە بخاتە ناو بەرنامەی کاری پەرلەمان.

لەلایەکی دیکەوە: د.سەباح سوبحی، ئەندامی لیژنەی یاسایی پەرلەمانی عێراق بە ئاڤا نیوزی گوت: بڕیاربوو ئەم شەممەیە دانیشتنی پەرلەمان بکرێت، بەڵام بەهۆی پشووەکانی چلەی ئیمامی حوسێن دواخرا. فراکسیۆنە کوردستانییەکان بڕیارمان داوە دوای دەستپێکردنەوەی دانیشتنەکان یەکەم کارمان یەکلاییکردنەوەی پرسی بەپارێزگابوونی هەڵەبجە بێت.

ئەوەی پێویستە بیزانیت: دوای ئەوەی پڕۆژەیاسای بەپارێزگابوونی هەڵەبجە دوو خوێندنەوەی لە پەرلەمان بۆ کرا و چەندجارێک لە بەرمانەی دانیشتنەکان دەرهێنرا، ئێستا تەنیا دەنگدان لەسەری ماوە. د.سەباح سوبحی دەڵێت: "بە لایەنە ناڕازییەکانی شیعە و سوننەمان گوتووە، ئێوەش پڕۆژەیەک پێشکەش بکەن بۆ بەپارێزگابوونی هەر شارێکی دەتانەوێت ئێمەش پشتگیریتان دەکەین".