پارێزگاری کەرکووک لەبارەی بەکارهێنانی زمانی تورکمانی و سریانی بڕیار دەدات

ئاڤا نیوز 

 

پارێزگاری کەرکووک داوا لە بەڕێوەبەرایەتی و فەرمانگە فەرمییەکانی پارێزگاکە دەکات لە نووسراوەکانیدا پشت بە هەردوو زمانی تورکمانی و سریانی وەک دوو زمانی سەرەکیی هاوتای عەرەبی و کوردی ببەستن.

 

وێنە گەورەکە: لە دوای دەستبەکاربوونییەوە، ئەمە سێیەمین بڕیارە کە ڕێبوار تەها، پارێزگاری کەرکووک دەریدەکات، یەکەم بڕیاری خانەنشینکردنی ڕاکان جبووری، پارێزگاری بە وەکالەتی پارێزگاکە بوو لە پۆستەکەی.

 

نووسراوی فەرمی: لە نووسراوێکدا کە لەلایەن ڕێبوار تەها، پارێزگاری کەرکووکەوە دەرچووە و ئاراستەی سەرجەم فەرمانگە فەرمییەکان، یەکە ئیدارییەکان، نووسینگە و بەشەکانی دیوانی پارێزگا و ڕێکخراوە مۆڵەتپێدراوەکانی کردووە "زمانی تورکمانی و سریانی هاوشانی هەردوو زمانی عەرەبی و کوردی لە فۆرم و نووسراوە فەرمییەکان بەکار بهێنن".

 

زانیاریی زیاتر: بەگوتەی پارێزگاری ئەو هەنگاوەیان "بە مەبەستی دڵنیابوون و پشتڕاستکردنەوەی ناسنامەی کەرکووک (برایەتی) و هەمەجۆریی پێکهاتەکانییەتی".

 

ئەمەش بزانە: ڕاستەوخۆ دوای دەستبەکاربوونی وەک پارێزگار لە 14ـی ئاب ڕێبوار تەها ڕێنمایی دابوو به‌ به‌كارهێنانی زمانی تورکمانی لە لێدوانه‌ فەرمییه‌كانی نێوان فه‌رمانگه‌كانی كه‌ركووک.