حەشارگەیەکی داعش لە چیای حەمرین بۆردوومان کرا

ئاڤا نیوز

فەرماندەیی ئۆپەراسیۆنە هاوبەشەکانی عێراق لەنێوبردنی حەشارگەیەکی چەکدارانی داعش و کوژرانی کۆمەڵێک چەکداری ڕێکخراوەکەی لە زنجیرەچیای حەمرین ڕاگەیاند.

وێنە گەورەکە: هەرچەندە لە ساڵی 2017ەوە کۆتاییهاتنی داعش لە عێراق ڕاگەیێنراوە، بەڵام ئەو ڕێکخراوە ناوەناوە بەردەوامە لە هێرشەکانی بۆ سەر هێزە ئەمنییەکان و هاووڵاتیانی مەدەنی.

ڕاگەیێنراوی فەرمی: شانەی ڕاگەیاندنی ئەمنیی عێراق ڕایگەیاند: "کاتژمێر 07:00ی بەیانی ئەمڕۆ پێنجشەممە، فەرماندەیی ئۆپەراسیۆنە هاوبەشەکان لەڕێگەی فڕۆکەی F16وە هێرشێکی سەرکەوتوویان لە زنجیرە چیای حەمرین لە چوارچێوەی کەرتی ئۆپەراسیۆنەکانی دیالە ئەنجامدا".

زانیاریی زیاتر: وەک لە ڕاگەیێنراوەکەدا ئاماژەی پێدراوە، بۆردوومانەکە بووەتە هۆی کوژرانی کۆمەڵێک چەکداری داعش کە لەنێو حەشارگەکەدا بوون، لەگەڵ لەنێوبردنی تەقەمەنی و کەرەستەی لۆجستی چەکدارەکان.