شاندی هەرێمی کوردستان بۆ پرسی مووچە لە بەغدا دەست بە کۆبوونەوەکانی دەکات

ئاڤا نیوز

شاندێکی وەزارەتی دارایی و ئابووریی هەرێمی کوردستان لە بەغدایە و ئەمڕۆ چوارشەممە بەمەبەستی چارەسەرکردنی کێشەی مووچە ژمارەیەک کۆبوونەوە دەکات، لەوانە لەگەڵ وەزیر و وەزارەتی دارایی.

چیرۆکی سەرەکی: ئێوارەی دوێنێ سێشەممە شاندێکی وەزارەتی دارایی و ئابووری کە لە پێنج بەڕێوەبەری گشتی پێکهاتووە (ژمێرکاری، دیوانی چاودێریی دارایی، داتا و ئامار، بەڕێوەبەری بودجە و جووڵەی دراو) سەردانی بەغدای کرد.

 

زانیاریی زیاتر: وەک ئاڤا نیوز زانیویەتی، کۆبوونەوە سەرەکییەکانی شاندەکە لەگەڵ تەیف سامی، وەزیری دارایی عێراق، بەشە جیاوازەکانی وەزارەتی دارایی وەک ژمێرکاری، دیوانی چاودێری دارایی و.. هیتد دەبێت و ئێستا دەستیان بە یەکەم کۆبوونەوە کردووە. هەر ئەمڕۆ لەگەڵ د.فوئاد حوسێن، جێگری سەرۆکوەزیران و سەرۆکی ئەنجوومەنی وەزاری بۆ ئابووری کە هاوکات وەزیری دەرەوەی عێراقیشە کۆدەبێتەوە.

ئەوەی پێویستە بیزانیت: کۆبوونەوەکان تایبەت دەبن بە چارەسەرکردنی هۆکاری نەناردنی مووچەی مانگی حەوت، نەناردنی مووچەی دوو مانگی هێزە ئەمنییەکان، ناوی دووبارە لە لیستی مووچە و مووچەی فەرمانبەرانی ناوچە کوردستانییەکانی دەرەوەی ئیدارەی هەرێمی کوردستان.