دوو هۆکار نرخی بەنزینی بازرگانی گران دەکەن

ئاڤا نیوز

هەر لیترێک بەنزینی بازرگانی لە بەنزینخانەکانی هەرێمی کوردستان بڕی 100 بۆ 150 دینار گران بووە، ئەمەش بۆ دوو هۆکار دەگەڕێتەوە.

وێنە گەورەکە: بەشێکی بەنزین لە ناوخۆ لە پاڵاوگەکانی کار و لاناز و قەیوان دابین دەکرێت، بەڵام بەشی پێداویستیی ناوخۆ ناکات، بۆیە لە پارێزگاکانی عێراق و وڵاتانی دەرەوەش هاوردە دەکرێت، بەتایبەت جۆرەکانی محەسەن و سوپەر، چەند مانگێکیش بوو بەنزیکەیی نرخی جۆرە جیاوازەکانی بەنزین جێگیر بوو.

کێشەی سەرەکی: دوو هەفتەیە نرخی بەنزینی بارزگانی بەرزبووەتەوە، بەجۆرێک پێشتر نرخی هەر لیترێک بەنزینی نۆرماڵ 800 بۆ 850 دینار بوو، ئێستا 925 بۆ 950 دینارە.
 
لێدوانی فەرمی: سیروان عەبدوڵڵا، سەرۆکی لیژنەی بەنزینخانەکانی هەولێر، دوو هۆکار بۆ ئاڤا نیوز ئاشكرا دەکات:
 
یەکەم: لە بازگەکانی  هەرێمی کوردستان گرفت بۆ هاوردەکردنی بەنزین لە پارێزگاکانی عێراق دروست بووە.

دووەم: لە چەند دەروازەیەکی سنووری بەنزین بۆ دەرەوە هەناردە دەکرێت. بەنزینەکە دەبرێتە ئێران و لەوێشەوە دەنێردرێتە چەند وڵاتێکی دیکە، ئەم بازرگانییە دروست 13 ڕۆژە دەستی پێکردووە.

ئەوەی پێویستە بیزانیت: تەنیا یەک بۆرسەی بەنزین هەیە و دەکەوێتە هەولێر، لەو بۆرسەیە نرخی بەنزین لە سەرتاسەری هەرێمی کوردستان دیاری دەکرێت. ئێستا نرخی بەنزینی نۆرماڵ لە بۆرسەدا 905 دینارە بۆ هەر لیترێک، لە بەنزینخانەکانیش بەمشێوەیە:- 

هەولێر: 930 بۆ 950 دینار 

دهۆک: 915 بۆ 925 دینار 

سلێمانی: 925 بۆ 940 دینار.

لەلایەکی دیکەوە: گرانبوونی نرخی بەنزین جۆرەکانی محەسەن و سوپەریشی گرتووەتەوە، نرخی هەر لیترێک محەسەن لە نێوان هەزار و 150 بۆ هەزار و 200 دینارە، سوپەر لە نێوان هەزار و 400 بۆ هەزار و 500 دینارە.

ئەمەش بزانە: حکومەتی هەرێمی کوردستان بەنزینی حکومی بە نرخی پاڵپشتیکراو،  هەر لیترێک بە 750 دینار لە هەولێر و دهۆک و، لە سلێمانیش بە 800 دینار بۆ ژمارەیەک بەنزینخانە دابین دەکات.