وەزیری گواستنەوەی عێراق گەیشتە ئیستەنبووڵ

ئاڤا نیوز 

بە مەبەستی بەشداریکردن لە لووتکەی وڵاتانی بەشداربوو لە پرۆژەی ڕێگەی گەشەپێدان، وەزیری گواستنەوەی عێراق گەیشتە ئیستەنبووڵ.

وێنە گەورەکە: پڕۆژەی ڕێگەی گەشەپێدان لە چوارچێوەی ئەو یاداشتە 26 خاڵییەی نێوان  بەغدا و ئەنقەرەیە کە لە 22ی نیسان لە میانی سەردانەکەی ڕەجەب تەیەب ئەردۆغان، سەرۆککۆماری تورکیا بە بەشداری قەتەر و ئیمارات لە بەغدا واژۆکرا. 

چیرۆکی سەرەکی: بڕیارە سبەی پێنجشەممە 29-8-2024 یەکەم کۆبوونەوەی لووتکە بە بەشداری وەزیرانی گواستنەوەی عێراق، تورکیا، قەتەر و ئیمارات لە کاتژمێر دووی پاش نیوەڕۆ لە کۆشکی دۆڵمەباخچە لە ئیستانبووڵ بەڕێوەبچێت.

ڕاگەیێنراوی فەرمی: وەزارەتی گواستنەوەی عێراق ڕایگەیاند: ڕەزاق موحێبس سەعداوی، وەزیری گواستنەوە بە مەبەستی بەشداریکردن لە کۆبوونەوەی چوار قۆڵی وزاری  تایبەت بە پرۆژەی ڕێگەی گەشەپێدان گەیشتە ئیستانبووڵ، چاوەڕوانی بڕیاری گرنگ لە کۆبوونەوەکە دەکەین. 

ئەوەی پێویستە بیزانیت: بەپێی وەزارەتی گواستنەوەی تورکیا، لە کۆبوونەوەکە دا وردەکاری کارکردن لەسەر پڕۆژەی رێگەی گەشەپێدان دەخرێتە ڕوو و پلان بۆ تەواوکردنی پڕۆژەکە لە ساڵی 2025 دادەنرێت.