ناوەڕۆکی کۆبوونەوەی هەولێر و بەغدا لەبارەی مووچە

ئاڤا نیوز

 

شاندی وەزارەتی دارایی هەرێمی کوردستان لەگەڵ وەزیری دارایی عێراق گفتوگۆیان  لەسەر کۆمەڵێک خاڵ کردووە، کێشەی مووچەی مانگەکانی حەوت، هەشت و نۆ چارەسەرکراوە.

 

وێنە گەورەکە: شاندی وەزارەتی دارایی هەرێمی کوردستان دوو ڕۆژە بۆ چارەسەری پرسی مووچە لە بەغدان، ئەمڕۆ لەگەڵ وەزیری دارایی عێراق کۆبوونەوە و لێکتێگەیشتنی نوێ لەبارەی چارەسەری کێشەکانی نێوان هەولێر بەغدا هەبوو.

 

لێدوانی فەرمی: شێروان دووبەردانی، ئەندامی پەرلەمانی عێراق بە ئاڤا نیوزی گوت، "لە کۆبوونەوەکە قسە لەسەر ناردنی 50%ـی داهاتی نانەوتی هەرێمی کوردستان بۆ عێراق کراوە، جەخت لەوە کراوەتەوە کە پڕۆسەی دروستکردنی هەژماری بانکی  بۆ فەرمانبەران خێرا بکرێت".

 

زانیاریی زیاتر: ئەو ئەندامەی پەرلەمانی عێراق گوتیشی، "وەزارەتی دارایی عێراق مووچەی مانگەکانی حەوت، هەشت و نۆ خەرج دەکات، بەڵام ئەو مەرجانەی بۆ وەزارەتی دارایی هەرێمی کوردستان دانراوە، دەبێت بۆ مووچەی مانگەکانی داهاتوو جێبەجێیان بکات".

 

ئەوەی پێویستە بیزانیت: وەزیری دارایی عێراق جەختی لە ناردنی سەرووی 160 ملیار دینار داهاتی نانەوتی مانگانە لەلایەن وەزارەتی دارایی هەرێمی کوردستان کردووەتەوە، هاوکات ئەو فەرمانبەر و هێزە ئەمنییانەی کە بایۆمەتریان کردووە کێشەی ناردنی مووچەیان نامێنێت، سەبارەت بە مووچەی فەرمانبەرانی ناوچەکانی دەرەوەی ئیدارەی هەرێمی کوردستان وردبینی کراوە و مووچەکانیان خەرج دەکرێت.