ڕاگەیێنراوێک لە گرووپی میدیایی ئاڤاوە

ئاڤا نیوز

خۆمان بە خۆشحاڵ دەزانین دوای شەش مانگ لە پەخشی کەناڵی ئاڤا سپۆرت، کە یەکێکە لە کەناڵەکانی گرووپی میدیایی ئاڤا، توانیمان متمانەی بینەرانمان بەدەستبێنین و، بەپێی داتاو و ڕاپرسییەکان ببینە پڕبینەرترین کەناڵی وەرزشی لە هەرێمی کوردستان.

 

لەو ماوە کورتەدا بوون بە یەکەمی شاشەی گەنجان، ئەرکێکی ئاسان نەبوو، بۆیە جێگەی خۆیەتی سوپاسی بەڕێوەبەر و ستافی کەناڵی ئاڤا سپۆرت بکەین، پیرۆزباییش لە سەرجەم کارمەندانی ئاڤا و بینەر و خوێنەرانمان دەکەین. لێرەشەوە مژدە بە خەڵکی کوردستان دەدەین کارەکانی وەرزی نوێی کەناڵی ئاڤا لە دوایین ڕۆژەکانیدایە و بەمزووانە دەستپێدەکەین. 

 

دڵنیایی دەدەین هاوشێوەی ئاڤا سپۆرت، پشتیوان بەخوا لە ماوەیەکی کورتدا دەبینە جێگەی متمانەی بینەران و بیسەرانمان، هەنگاوی یەکەمی سەرکەوتنیشمان لە ئاڤا نیوز و سۆشیاڵ میدیا، هۆکارێکی دیکەی سەرکەوتنمان دەبێت.

 

هەنگاوە سەرەتاییەکانی گرووپی میدیایی ئاڤا زۆر دڵخۆشکەرن؛ هەر لە سەرکەوتنەکانی کەناڵی ئاڤا سپۆرت لە شەقامی ئیسکانی هەولێر و بابەتە پڕ زانیارییەکانمان بۆ شاشەی مۆبایلی دەستی گەنجان، لە دواهەمین کاریشماندا سەرکەوتنی پرۆژەی فیلمی کفن، کە لە ماوەیەکی کەمدا ڕیکۆردی هەموو فیلمە کوردییەکانی پێش خۆی شکاندووە، ئەمانە مشتێکن لە خەرواری سەرکەوتنەکانمان کە هەر بەگوتەی گەورە دەرهێنەرانی سینەمای کوردی؛ فیلمی کفن نموونەیەکی سەرکەوتووی فیلمی کوردییە، هۆکارێکیشە بۆ بوژانەوەی سینەمای کوردی و دڵخۆشکردنی هونەرمەندانی کوردستان.

 

گرووپی میدیایی ئاڤا

2024-8-29