گوێتان لە سەرۆکوەزیران بوو، چۆن تێیگەیشتن؟

ئەگەر لێت بپرسن پەیامە چەند خولەکیەکەى سەرۆکوەزیرانى هەرێمى کوردستان لە میانی کۆبوونەوەی ئەنجوومەنی وەزیران کە دوێنێ لە ئاڤا میدیا بڵاوبووەوە لاى تۆ چى دەگەیێنێت، چۆن وەڵام دەدەیتەوە؟

 

ئەو وەڵامە بۆ تۆ وەک هاونیشتمانییەکى کوردستان بەجێدەهێڵین، بەڵام ئێمە لە ئاڤا میدیا پێمانوایە پەیامەکەى سەرۆکوەزیران دوو بەشى لەخۆگرتبوو؛ بەشێکى پەیامى ئاسوودەیی و مژدە و پیرۆزبایی بوو بۆ خەڵک، بەشەکەى دیکەشی پەیامی یەکڕیزى و جەختکردنەوە لە هاوماڵى کوردستانیى بوو بۆ پارتە سیاسییەکان و خەمی داهاتوو.

 

پەیامى مژدە و ئاسوودەیی

 

دەستپێکى وتەکانى سەرۆکوەزیران بەشداریکردن بوو لەو دڵخۆشییەى لەلای بەشێکى باش لە مووچەخۆران و خانەنشینان هەیە بە هاوتاکردنى مووچەکانیان لەگەڵ هاوتاکانیان لە عێراق، ئەمە بۆ کابینەى نۆى حکومەت جێی دڵخۆشییە، چونکە هەر لە سەرەتاوە ئەم کابینەیە هەوڵی داوە لەگەڵ عێراق بە ئاراستەی ڕێککەوتن بڕوات، لەپێناو دەستەبەرکردنی ماف و شایستە داراییەکانى مووچەخۆرانى هەرێمی کوردستان.

 

ئەمەش بەشێک بوو لە ئەنجامەکانی ئەو هەوڵانە و بڕیارە لە چەند ڕۆژى داهاتووشدا چەسپاندنى هەنگاوکانى ڕێککەوتنى نێوان هەردوو سەرۆکوەزیرانى هەرێمی کوردستان و فیدراڵ ببینرێ و هەروەها کۆتاییهێنان بە گرفتى دووبارەبوونەوەى دواکەوتنی مووچە کە مانگانە ڕوو دەدات.

 

سەرۆکوەزیران لەو پەیامەدا جارێکى دیکە جەختی لە بەگرێبەستکردنى وانەبێژانى وەزارەتى پەروەردە کردەوە و دڵخۆشیى خۆى بەم هەنگاوە خستەڕوو، وەک یەکێک لە کارە گرنگەکانى کابینەى حکومەت، چونکە بەگرێبەستکردنى زیاتر لە 30 هەزار مامۆستا کارێکى گرنگە لەسەر داهاتی ناوخۆ و بەرهەمی پێداگریی مەسرور بارزانییە.

 

ئەو جەختکردنەوەیە هەموو ئەو پڕوپاگەندانە بەدرۆ دەخاتەوە کە دژ بەم بڕیارە بڵاودەکرانەوە و بەمەبەست هەندێک میدیای شڵەژاو دەیانویست بیکەنە دەستکەوتی خەڵکی دیکە.

 

پەیامى یەکڕیزیی و هاوماڵى

 

بەشێکى دیکەی وتەى سەرۆکوەزیران خەمى نیشتمانیی لێ دەخوێنرایەوە، ئەو تیشکى خستە سەر هەڵبژاردنەکان، هۆشداریی ئەوەشی دا کە نابێت هەڵپە و تاى هەڵبژاردن بنەمای یەکڕیزى و سەوابیتە نیشتمانییەکان لەبیر بەرێتەوە.

 

پەیامەکە ڕوون بوو بۆ کۆى پارتە سیاسییەکان کە دەبێت لە هەڵمەتى هەڵبژاردندا پرەنسیپی یەکڕیزىی نیشتیمانى بپارێزن و وەک یەک ماڵ سەیرى کوردستان بکەن.

 

مەسرور بارزانی وەک سەرۆکوەزیرانێکی خۆڕاگر  21ـی ئۆکتۆبەری لەبەرچاوە و دەزانێ هەموولایەک دەبێت بگەڕێنەوە هەولێر بۆ گفتوگۆ، بۆیە ئەو قسەی دڵی زۆر کەسی کرد کە وتی کارێک بکەن ڕووتان بێت بێنەوە سەر مێزی گفتوگۆ.

 

هەموو کەس ئازادە چۆن هەڵمەتی هەڵبژاردن دەکات، بەڵام ڕەنگە  بۆ سەرۆکوەزیرانیش وەک هەموو کەسێک جێگای سەرسووڕمان بێت، کەسی یەکەمی حیزبێکی سەرەکیی حکومەت، لەجیاتی پرۆژە و بەرنامەی هەڵبژاردن و هەڵگرتنی بەرپرسیاریێتی و وەڵامدانەوەی ئەوەی بۆ ناوچەکانی ژێر دەسەڵاتی تەنانەت ئەو شەقامەشی بەناوی مام جەلالەوەیە بێ خزمەتە، خەریکی ئەوەیە لەلایەن مێرمنداڵەکانی ناو فەیسبووک دەبێتە ترێند یان نا.