لە بەغداوە بۆ هەولێر سەرۆککۆماری ئێران ڕەنگی كراسەكەی گۆڕی

ئاڤا نیوز

دوێنێ لە بەغدا ڕەنگی كراسەكەی مەسعود پزیشكیان، سەرۆککۆماری ئێران سپی بوو، ئەمڕۆ لەگەڵ هاتنی بۆ هەولێر ڕەنگەكەی بۆ ڕەش گۆڕی.

 

چیرۆکی سەرەکی: دوێنێ پزیشكیان بە سەردانێك گەیشتە بەغدای پایتەختی عێراق و لەگەڵ محەممەد شیاع سوودانی، سەرۆكوەزیرانی عێراق كۆبووەوە، سەرۆككۆماری ئێران قاتێكی ڕەش و كراسێكی سپی لەبەر بوو، كۆبوونەوە و سەردانەكانیشی بە هەمان جلوبەرگ كرد.

زانیاریی زیاتر: ئەمڕۆ پێنجشەممە مەسعود پزیشكیان بە سەردانێک گەیشتە هەولێر و لە فڕۆكەخانە لەلایەن نێچیرڤان بارزانی، سەرۆكی هەرێمی كوردستان پێشوازی لێكرا. لە سەردانەكەیدا بۆ شاری هەولێر، ئەوەی تێبینی كرا مەسعود پزیشكیان هاوشێوەی دوێنێ قاتێكی ڕەشی لەبەردا بوو، بەڵام ڕەنگی كراسەكەی گۆڕیبوو بۆ ڕەنگی ڕەش.

ئه‌وه‌ی له‌باره‌یه‌وه‌ دگوترێت: هەرچەندە لەنێو خەڵك ڕەش بە ڕەنگی خەمۆكی ناسراوە، بەڵام بەپێی دەروونناسیی ڕەنگەكان، ڕەش واتای سەرنجڕاكێشی و نهێنی و قووڵی دەدات.

ئەمەش بزانە: ڕەنگی ڕەش بەهۆی ئەوەی تیشکی خۆر زیاتر هەڵدەمژێت بۆ وەرزی گەرما گونجاو نییە، بەڵام کەشوهەوا لە هەرێمی کوردستان بەراود بە بەغدا و شارەکانی عێراق فێنکتر و شێدارترە.