ڕێکخراوی هەنگاو: لە خۆپیشاندانەکانی بزوتنەوەی "ژن ژیان ئازادی" 142 کورد کوژراون

ئاڤا میدیا 

 

لەیادی دوو ساڵەی گیان لەدەستدانی (ژینا ئەمینی)، ڕێکخراوی مافی مرۆڤی هەنگاو ڕایدەگەیێنێت، لە ماوەی خۆپیشاندانەکانی بزوتنەوەی "ژن، ژیان، ئازادی" 142 هاووڵاتی کورد کوژراون.

 

وێنە گەورەکە: دوای گیان لەدەستدانی ژینا ئەمینی، خۆپیشاندانی سەرتاسەری لە ئێران و وڵاتانی جیهان ئەنجامدران و لەلایەن چالاکوانانەوە دروشمی ئەو خۆپیشاندانانە ناوی لێنرا بزوتنەوەی "ژن، ژیان، ئازادی".

 

لێدوانی فەرمی: ئەرسەلان یار ئەحمەدی، سەرۆکی ڕێکخراوی مافی مرۆڤی هەنگاو بە ئاڤا نیوزی گوت، لە سەرەتای خۆپیشاندانەکانی بزوتنەوەی "ژن ژیان ئازادی" 142 کەس کوژراون، لەو ژمارەیە %32 خێزاندار و %67 سەڵت بوون کە تەمەی 15 ساڵ تا 72 ساڵی تێدایە. 

 

لەو ئامارەی خراوەتە ڕوو 90 کەس بەتەقەی ڕاستەوخۆی هێزە ئەمنییەکان کوژراون، لەناویاندا 16 منداڵ هەن، 14 کەسیش دوای دەستگیرکردنیان لەژێر ئەشکەنجە گیانیان لەدەستداوە. 

 

ئەوەی پێویستە بیزانیت: ئەو کەسانەی لەماوەی خۆپیشاندانەکان گیانیان لەدەستداوە، 22 کەسیان خەڵکی شاری سنە، 17 کەسیان خەڵکی بۆکان و 15 کەسییان خەڵکی مەهاباد بوون، لەکۆی ئامارەکان شەش ژن گیانیان لەدەستداوە.

 

باکگراوند: ژینا ئەمینی تەمەن 22 ساڵ لەسەر پێناسەکەی ناوی بە (مەهسا ئەمینی) نووسراوە، کچە کوردێکی شاری سەقزی ڕۆژهەڵاتی کوردستان بوو، ڕۆژی 13ی ئەیلولی 2022 لە میترۆی حەقانی ناو تارانی پایتەخت لەلایەن پۆلیسی ڕەوشت بەبیانووی نەبەستنی سەرپۆش دەستگیرکرا، سێ ڕۆژ دواتر لە نەخۆشخانەی کەسرا گیانی لەدەستدا.