لە هەرێمی کوردستان بۆ پاراستی چینی ئۆزۆن ڕێگە بە هاوردەکردنی هەندێک ئامێر نادرێت

ئاڤا نیوز

 

ڕۆژی جیهانی پاراستنی چینی ئۆزۆنە و دەستەی ژینگە ڕایدەگەیێنێت، هەرێمی کوردستان پابەندی ڕێککەوتنی ڤیەننا و پڕۆتۆکۆڵی مۆنتریاڵە، ساڵانێکە لەڕێگەی قەدەغەکردنی هاوردەی ئەو ئامێرانەی بە غازەکانی (کلۆر، فلۆر، کاربۆن) کاردەکەن، پابەند دەبێت.

 

بۆچی گرنگە: لە ساڵی 1985-ـەوە لێکۆڵەران تێبینی کونبوونی چینی ئۆزۆنیان کردووە و هۆشداری لە فراوانبوونی دەدرێت، چینی ئۆزۆن زه‌وی و مرۆڤ له‌ تیشكی زیانبه‌خشی سه‌رووبنه‌وشه‌یی ده‌پارێزێت.

 

لێدوانی فەرمی: ڕەزاق خەیلانی، گوتەبێژی دەستەی پاراستنی ژینگە بە ئاڤا نیوزی ڕاگەیاند، ماوەی چەند ساڵێکە لیستی کۆمەڵێک جۆری غازی ئامێری ساردکەرەوەی وەک؛ سپلیت و بەفرگر و ئەو ئامێرانەی لەسەر شێوازی کۆن دروست دەکرێن، دراوەتە وەزارەتی بازرگانیی و بەڕێوەبەرایەتی گشتی گومرگ؛ تا ڕێگە لە هاوردەکردنیان بگیرێت، چونکە ئەو ئامێرانە بە غازە زیانبەخشەکان کار دەکەن، ئەوەی ئێستا هاوردە دەکرێت بەو غازە زیانبەخشانە کار ناکەن.

 

زانیاریی زیاتر: ئەو غازانەی دیاریکراون ئەگەر هەبن بۆ ئەو ئامێرانەن کە لە ساڵانی ڕابردوودا هاوردەکراون و هاونیشتمانیان بەکاری دەهێنن، ڕەزاق خەیلانی دەڵێت، تا ئەو ئامێرانە مابن ناتوانن دەستبەرداری بەکارهێنانی غازە زیانبەخشەکان ببن، خاڵی دڵخۆشکەر ئەوەیە ئێستا بە ڕێژەیەکی کەمتر ئەو جۆرە غازانە بەکاردێن.

 

ئەوەی پێویستە بیزانیت: ڕێکخراوی نەتەوە یەکگرتووەکان، ڕۆژی 16ـی ئەیلولی هەموو ساڵێکی وەک ڕۆژی پاراستنی چینی ئۆزۆن دیاریکردووە، عێراق ماوەی چەند ساڵێکە چووه‌تە نێو ڕێككه‌وتنامه‌ی ڤییه‌نا و پڕۆتۆکۆڵی مۆنتریاڵ بۆ پارێزگارییكردن له‌ چینی ئۆزۆن.