شەپۆلێکی بارانبارین دەگاتە هەرێمی كوردستان

ئاڤا نیوز

 

دەستەی كەشناسیی عێراق ڕایدەگەیێنێت، سبەی یەكشەممە شەپۆلێكی بارانبارین دەگاتە هەرێمی كوردستان و تا شەوی ڕۆژی دواتر بەردەوام دەبێت.

 

وێنە گەورەكە: بەهۆی كاریگەری دوو شەپۆڵی ساردی دەریای ڕەش لە باكوور و دەریای سپیی ناوەڕاست لە ڕۆژئاواوە، كەشوهەوای هەرێمی كوردستان بەشێوەیەكی بەرچاو گۆڕانكاری بەسەردا هاتووە و پلەكانی گەرما نزم بوونەتەوە، بەپێی پێشبینییەكانیش یەكەم بارانبارینی ئەمساڵ دەگاتە ناوچە شاخاوییەكانی هەرێمی كوردستان.

 

ڕاگەیێنراوی فەرمی: بەپێی ڕاگەیێنراوی دەستەی كەشناسی و بوومەلەرزەزانیی عێراق، لە ڕۆژی یەكشەممە 12ـی ئۆكتۆبەر، یەكەم شەپۆلی بارانبارینی ئەمساڵ، ڕوو لە ناوچەكانی باكووری عێراق دەكات و بارانبارین بەشێوەی پچڕ پچڕ و بە بڕی جیاواز دەبارێت، تا ڕۆژی دووشەممە بەردەوام دەبێت، ئەوەشی وەك یەكەم ئاماژەی دەستپێكردنی وەرزی بارانبارین وەسف كردووە.

 

ئەوەی پێشبینی دەكرا: پێشتر شێخ دارا، شارەزای كەشناسی و پێشكەشكاری ئاڤا میدیا، پێشبینی دابەزینی پلەكانی گەرمای كرد بۆ ژێر پلەی سییەكان و ئاماژەی بەوەشكرد، ئەگەری بارانبارین لە ناوچە شاخاوییەكانی هەرێمی كوردستان هەیە.