بەبێ ڕاگەیاندنی پێشوەختە سوودانی بەرەو شەرەم شێخ بەڕێکەوت

ئاڤا نیوز

سەرۆکوەزیرانی عێراق، بە مەبەستی بەشداریکردن لە لووتکەی ئاشتیی غەززە بەرەو شەرەم شێخی میسر بەڕێکەوت، بەر لە سەردانەکە باس لە بەشداری عێراق لە لووتکەکە نەکراوە.

چیرۆکی سەرەکی: بڕیارە پاشنیوەڕۆی ئەمڕۆ دووشەممە لووتکەی ئاشتیی غەززە لە شاری شەرەم شێخ بە سەرۆکایەتی هەریەک لە عەبدولفەتاح سیسی، سەرۆکی میسر و دۆناڵد ترەمپ، ئەمریکا و بە بەشداری نوێنەرانی زیاتر لە 20 وڵات و ڕێکخراوە نێودەوڵەتییەکان بەڕێوەبچێت. ئیسرائیل و حەماس بەشداری لووتکەکە ناکەن.

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق ڕایگەیاند، بەیانی ئەمڕۆ دووشەممە 13ـی تشرینی یەکەمی 2025، محەممەد شیاع سوودانی، سەرۆکوەزیرانی عێراق بە مەبەستی بەشداریکردن لە لووتکەی ئاشتیی غەززە بەرەو شەرەم شێخی میسر بەڕێکەوت.

لەلایەکی دیکەوە: بەشداری سوودانی لە لووتکەکە چاوەڕوانکراو نەبوو، چونکە پێش سەردانەکە بە هیچ شێوەیەک باس لە بەشداریکردنی عێراق لە لووتکەکە یان ئاراستەکردنی بانگهێشتنامە لەلایەن میسر یان ئەمریکا بۆ عێراق بۆ ئامادەبوون لە لووتکەکەدا نەکرابوو.

ئەوەی پێویستە بیزانیت: ئەمریکا و میسر و قەتەر و تورکیا لە میانی بەڕێوەچوونی لوتکە چاوەڕوانکراوەکەدا بەڵگەنامەیەکی گەرەنتی بۆ ڕێککەوتنی ئاگربەست لە غەززە واژۆ دەکەن.