شێخ دارا: بەفر و بارانبارین دەستپێدەکات

ئاڤا نیوز

بەپێی پێشبینییەکانی کەشوهەوا، لەدوای نیوەڕۆی سبەی یەکشەممە بارانبارین لە هەرێمی کوردستان دەستپێدەکات و لە ناوچە شاخاوییەکانیش ئەگەری بەفربارین دەبێت.

لێدوانی فەرمی: شێخ دارا، پێشكەشكاری ئاڤا میدیا ڕایگەیاند، ئەگەر هەیە لە دوای نیوەڕۆی سبەی یەکشەممە لە هەرێمی کوردستان بارانبارین لە زاخۆ و سۆران و دهۆک دەستپێبکات و لە ناوچە شاخاوییەکانیش ئەگەری بەفربارین هەیە.

دەشڵێت، "لە سەرەتای مانگی 9 ئاماژەمان دا بە کاریگەریی دابەزینی پلەکانی گەرما و نزیکبوونەوەی شەپۆلە یەک بە دوا یەکەکانی پاڵەپەستۆی جەمسەری باکوور کە لە دەریای ڕەش هاتووەتە باکوور و ناوەڕاستی باکوور، ئێستا لەم ناوچانە بارانبارین دەستیپێکردووە و لە هەندێک ناوچەش بەفر دەبارێت.

لەلایەکی دیکەوە: ئەمڕۆ شەممە 11-10-2025، دەستەی کەشناسی و بوومەلەرزەزانی عێراق ڕایگەیاند، لە ڕۆژی یەكشەممە 12ـی ئۆكتۆبەر، یەكەم شەپۆلی بارانبارینی ئەمساڵ، ڕوو لە ناوچەكانی باكووری عێراق دەكات و بارانبارین بەشێوەی پچڕ پچڕ و بە بڕی جیاواز دەبارێت، تا ڕۆژی دووشەممە بەردەوام دەبێت، ئەوەشی وەك یەكەم ئاماژەی دەستپێكردنی وەرزی بارانبارین وەسف كردووە.